January ni 17, 2017 khan Aizawl FC chuan 2-1 in an mikhual Shillong Lajong FC an hneh a, khelh thum atangin point 7 hmuin I League hmahruaitu nimahse Mohun Bagan-in an mikhual Minerva Punjab FC 4-0 ngawta an sawp avangin I League hmahruaitu an ni leh ta a ni.

Kolkata club hian khelh thum atangin point 9 an hmu a, I League an khelh vawikhatnaah Minerva FC hian point 1 bak an la hmu lo thung. Minerva lakah Bagan tan Daryll Duffy leh Mizo striker chhuanvawr Jeje Lalpekhlua te'n goal hnih ve ve khungin harsa lo takin Minerva an hneh a ni.

Thla hnih dawn a chawlh hnuah Jeje-a'n a vawikhatna atan I League-ah inkhel bul a tan a, Indian Footballer of the Year nilai hian a thiamzia a pholang nghal kan ti thei ang. Chennaiyin FC striker hi a inhliam lo a nih ngat chuan I League champion nih tum Bagan tan a tangkai hle ang.

Inkhel dangah DSK Shivajians chuan 2-0 in I League kaithar Chennai City FC an hneh a, India chhim lama awm team pahnih tan hian Mizo pali ngawtin inkhel bul an tan a ni. MPL khelh zawh taka Best Player leh Best Forward a thlan Malsawmfela'n Chennai tan inkhel bul tanin DSK lamah Mizo rawlthar duhawm Jerry Lalrinzuala, Jerry Mawihmingthanga leh Lallianzuala Chhangte te'n inkhel bul an tan ve bawk.

Liverpool nena inthlunzawm DSK tan Real Madrid academy chhuak Juan Quero a hmuhnawm a, DSK goal khatna Kim Song Yong tauh goal hi a siamsak niin second half-ah penalty atangin goal khat dang a khung ve bawk. Quero hian first half-ah pawh goal khunga hun tha a nei a, yard 27 vel atanga a free-kick pet tha zet chu Chennai goalkeeper Meloly chuan a dang tha rem rem hle. DSK hian khelh thum atangin point thum an hmu a, khelh zat inangah Chennai City FC hian point khat chiah an la hmu thung.