Aizawl FC chuan Hero I-League 2016/17 -ah match thumna khelin 2-1 in Shillong Lajong FC an hneh a, Rajiv Gandhi Stadium-ah Aizawl FC tan Ruatthara leh Jayesh ten goal an khung a, Shillong Lajong FC tan Yuta chuan penalty atangin goal khat a khung ve bawk.

Aizawl FC hian match thumah tlawm an la nei lova, East Bengal an inhnehtawkpui hnuah Minerva Punjab FC si khat faiin an hneh a, Shillong Lajong FC 2-1 in an hneh leh ta a, khelh 3 atangin point 7 an hlawhchhuak ta a ni.

Aizawl FC 2-1 Shillong Lajong FC

(Ruatthara 32', Jayesh 63') (Yuta 85' pen)

Aizawl FC XI: Albino(GK), Kingsley, Rinzuala, Zotea, Al Amna, Albert, Jayesh, MK-a, Alfred, Kamo, Ruatthara.

Subs: Lalnuntluanga, BT-a, Lalnunpuia Tlau, Laldanmawia Ralte, T Mawia, Lalthakima, Ashutosh Mehta

Lajong XI: Vishal(GK), Tamang, Chinglensana, Adinga, Pena, Dicka, Isaac, Sandeep Singh, Redeem Tlang, Pritam Kumar, Yuta Kinowaki

subs: Rupert Nongrum, Samuel Lalmuanpuia, Hardy Cliff, Jacob Lalrawngbawla, Alen Deory, Bipin Singh, Phurba Tempa(GK)

Aizawl FC hian first half tan atanga minute 5-na lekah penalty an chawi a. Box chhungah Ruatthara chuan Redeem Tlang a titlu, referee Pranjal Banerjee chuan penalty a ham. He penalty hi Fabio Pena chuan petin Aizawl FC goalkeeper Albino chuan a save hlauh mai.

Darkar chanve an khel tling chiah tihin Aizawl FC chuan Ruatthara hmangin goal an khung a. Box veilam sir atanga Ruatthara cross chu Alfred chuan a kheng, Shillong goalkeeper Vishal Kaith chuan a lo dang, hemi per hi Ruatthara chuan hnai set sawt atangin a pet goal ta a ni.

Second half 63 mins-ah Aizawl FC chuan Jayesh Rane hmangin goal hnihna an khung. Mual veilam sirah Al Amna hmangin Aizawl FC chuan counter attack an nei a, attacking third-ah Aizawl FC players an la thleng phei hman lo, Al Amna hian a nghak khawm a, mual dinglama Jayesh tan ball tha tak Al Amna hian a thlawh, Jayesh chuan box a thlenpui hnuah a pet goal ta a ni.

Shillong Lajong FC chuan hun tawp dawn minute 5 a la awm tihin penalty an hlawhchhuak a, Kingsley chuan Yuta titluin he penalty hi Yuta chuan a pet chhunzawm, a club hlui lamah Yuta Kinowaki chuan goal a khung ta a ni.

He match-ah hian Aizawl FC chuan goal dang khungna chance an nei a, MKa chuan Al Amna cross chu hnai set sawt atangin an pet, Shillong defender ten an lo dang kawi hlauh a, a goal teuh hle a ni. Alfred pawhin set piece atanga a ball dawn chu 6 yard box atangin a pet over a, Shillong hian goal hlauhawm vawi hnih kat neiin second half tan tirah Pena chuan a tauh goal teuh hle a, a out chiah chiah a ni. 

He match-a vawi khat assist nei leh Aizawl FC midfield thununtu Al Amna chu man of the match-a thlan a ni a, a zawnin man of the match a ni ta a ni. Aizawl FC chuan khelh thum atangin point 7 an hlawhchhuak a, 2016/17 Hero I-League ah hmahruaitu an ni mek a ni.

Photo : PC Lala