27 May 2017 02:57

Inkhel

Mizo Sports Website hmasa ber

​Football transfer titi lengvak ho hi dawt a ni em?

Nipui bazar a inhawng chho leh tawh dawn, transfer window a inhawn hma hauh atang pawhin chanchin ngaihnawm deuh deuh a awm nghal. Heng chanchin hrang hrangte hi phuahchawp mai mai nge a nih? A tak tak?

Tunah pawh hian Griezmann leh Manchester United sawi zawm a ni mek a, Sanchez leh Bayern Munich sawi zawm a ni mek bawk. Thawkkhat lai khan United chuan chuan Neymar an bia tih thuthang te a awm, vawiinni thlengin an la inlei lo chu a ni a. Media te hian transfer chanchin tam tak hi an risk nge? Indawrna a awm chiang a, mahse a hlawhtling lo zawk? Tlema zawng thlir kir teh ang khai.

Kum 2015 July thla khan Schalke atangin Draxler chu Juventus lamah a kal dawn nia sawi a ni hman.  Juventus leh Draxler te kha personal terms-ah pawh an inrem vek tawh niin Sky Sport Italia chuan tarlang mahse Juventus-ah Draxler vawiin thlengin kan hmu ta lo. PSG lamin nikum khan an lei ta a nih kha. Kha transfer titi kha dawt nge thu tak?

A nihna takah chuan Draxler kha Schalke khan chhuah tir an phal, Juventus pawh khan chang tawh turah an inngai. Hetih lai hian club pahnih kha thil pakhatah an inrem thei ta lo. Juventus khan suma harsatna an tawh avangin loan-a lak an duh laiin Schalke erawh chuan 30 million euro emaw tala hralh an duh, payment an duh tlat si avang khan club pahnih indawrna a tlawlh ta a nih kha.

De Gea leh Real Madrid indawrna pawh kha a ngaihnawm. Spanish goalkeeper khan Real Madrid pan a duh, Real Madrid pawhin lei ngei an tum ruh hle. De Gea chuan Real Madrid a pan ngei dawn tiin media te chuan an tarlang chuai chuai tawh, mahse vawiin thlengin Man Utd-ah a la khel. Kha transfer titi pawh kha phuahchawp a ni thei angem?

Ni love, Indawrna a fel chho duak, De Gea chuan Madrid lam a pan tep, kum 2015 nipui transfer deadline day-ah khan Manchester United chuan an goalkeeper tha hi an hralh phal lo leh thut,  file pawimawh inthawnna an tibuai lui a, an file thlawn kha Real Madrid lamin an hawng thei lo, transfer a theih ta loh. Real Madrid goalkeper Navas kha Man Utd lama kal tura tih a ni bawk a, Manchester pan turin airport a thleng vek tawh nghe nghe, mahse Navas chuan UCL leh La Liga title a lakpui chhunzawm ta a nih hi.

Jose Mourinho chungchang pawh kum chanve dawn transfer chanchin luah tu a ni. December ni 17, 2015 khan Chelsea chuan an ban a, ban a nih atanga reilote chhungin Manchester United nen sawi zawm a ni nghal. London-a United hotute nen an indawr lai te pawh media lamin an hmu, mahse Van Gaal kha United boss a la ni tlat bawk si nen.

Media te chuan Mourinho kha United boss thar tur a ni tih an chiang vek, mahse chiang vek tawh pawh nise, a la nih miau si lova, Van Gaal chuan FA Cup a chawipui chhunzawm,  United-in boss thar an nei dawn nge? Van Gaal-a'n a contract a hmang zo dawn? Transfer titi a ngaihnawm. Media te sawi a lo dik ta nge nge, Van Gaal ban a ni a, Jose chu United boss atana lak niin, Europa League leh League cup-ah Jose chuan United a champion pui ta a ni.

Sawi dawn chuan sawi tur a tam lutuk, transfer bazar a inhawng chho anga, chanchin mak pui pui a awm leh nawk dawn. Heta kan hriat atana tha chu, risk pawh an nei hlawm ang, mahse engemaw awm lo chuan an risk mai mai bik lo tih hi hria ila. Tute emawin tawngkam engemaw an han nei a, anmahni ngei pawhin engemaw an sawi a, chhuak tur ang ten an tarlang chhunzawm nghal a, thil awm lo pawh a ni hran lo.

Mi tam takin english media te khu thil risk nasa lutuk ang tein kan ngai thin. Transfer an sawi tam tak a hlawhtlin loh vang a ni ve bawk a. Hetih lai hian transfer titi chanchin tlem kan tarlan atang khian thil chiang tak chu, indawrna hi a awm thin ngei a, mahse a hlawhtling thin lo mai zawk niin a lang. Chuvang chuan transfer titi hi dawt muhlum a ni lo kan ti thei awm e.