​De Gea-a'n Real Madrid a zawm hman ta lo !

01st September 2015, 02:09PM

Real Madrid leh Manchester United chu Spanish goalkeeper De Gea manah £29m-in an inrem vek tawh, hetih lai hian lehkha pawimawh erawh transfer deadline hmain an tifel hman ta lo. De Gea chuan Real Madrid a zawm thei ta lo a ni tih BBC chuan a tarlang.

England-ah chuan September ni 1 thleng transfer window hi hawn a ni a, France, Germany, Italy leh Spain-ah chuan June ni 1 atanga August ni 31 thleng a ni a, England-ah erawh July ni 1 atanga September ni 1 thleng a ni thung a.

Spain transfer hun a tawp tawh, nizan khan engkim tihfel hman tumin an bei a, mahse lehkha an ziak fel hman ta lo. Document thenkhat thehluh hman a nih chang hian ngaihhnathiamna an nei thin a, darkar hnih khat pawhsei sak an ni thin, mahse De Gea chungchangah erawh chutiang pawh chu tih hman a ni ta lo a ni.

Manchester United leh Real Madrid te hi De Gea manah £29m-in an inrem bakah De Gea manah United hian Keylor Navas an la tel dawn bawk a, mahse heng zawng zawng hi a thleng ta lo. Chutih laiin United hian Keylor Navas erawh lakhna hun a la awm tho a ni.

Spain lam atanga report chuan he thil an pamtul nachhan chu Manchester United chet muan vang niin an tarlang. Manchester United erawh chuan hei hi an pha nasa hle a, engkim a dan dik takin, a hun takah an thehluh thu an sawi ve bawk a. Real Madrid hian FIFA lamah an zualko dawn nge zualko dawn lo a hriat chiah loh.

De Gea chuan loh theih lohva United a zawm leh chu a ngai dawn ta, mahse Van Gaal hian 1st choice atan a hmang dawn nge dawn lo erawh a hriat tawh loh. A hlauhthawn ang ngeiin De Gea chuan Real Madrid a zawm thei ta lova, an chanchin hi enge ni zel dawn lo thlir phawt mai teh ang.

picture credit : Getty

Copyright © inkhel.com 2024. All rights reserved.