27 May 2020 08:11

bakteaJr.

Mizo tlangval

​The Last Dance: Episode 2

The Last Dance episode 1 chungchang kar hmasa lamah kan ti chhuak tawha, a hmmuhnawm nghalin, episode 2 pawh a hmuhnawm leh hle.

Episode 2 hi Michael Jordan-a chungchang ni deuh ber leh tho mahse, MJ-a khelhpui thin Scottie Pippen-a chungchang a tam hle a, episode 2 ah hian Chicago Bulls tan leh a bik takin MJ-a tan Pippen-a tangkai zia kan hmu.

MJ hi NBA player awm tawh zawng zawnga lar bera chhal ngam leh thiam bera chhal ngam a ni a, mahse basketball hi team-a khelh a nih miau avangin MJ pawh hian a mah chauhin team a chakpui thei lova, a team a mamawh ve tho a ni.

MJ hi a lar fal em avang leh a that em avangin eng emaw chenah a team-mate te a hliahkhuh a tih loh theih lova, Pippen ngei pawh hi MJ hian a hliahkhuh niin a langa, tun thlengin Pippen hi NBA player awm tawh zinga player a that ang hu a fak hlawh lo (underrated) ber a tih theih hial awm e.

Pippen hi Bulls team-ah MJ tih lovah chuan player tha ber leh tangkai ber niin, Bulls that lai berin Pippen hi Bulls player zingah score hnem ber pahnihna a ni a, rebounds-ah pahnihna niin, khelh tam zawngah pahnihna a nih bawk bakah, assist nga ber leh steals ngah ber a ni a, heti chung hian a hlawh chu a that ang aiin a tlem hle. Pippen hi Bulls player zingah hlawh tam ber parukna chauh a ni a, NBA player zinga hlawh hnem 122-na chauh a ni pha.

6 ft 8’-a sang Bulls small forward hlui hi hmatawnga a that tluk zetin defence lamah pawh a tangkaia, The Last Dance-ah pawh hian MJ chuan Pippen chu khelhpui nuam a tih ber a nih thu sawiin, a mah pui nasa ber tu a nih thu a sawia, MJ hian, “Michael Jordan-a chungchang an sawi chuan, Scottie Pippen-a chungchang pawh an sawi ve ngei ngei tur a ni a, ka championship hlawhchhuah tawh zawng zawng kha Scottie Pippen-a tel lovin ka hlawhchhuak lova, chuvang ka team mate tha ber a ni,” a ti hial.

Pippen hi US state Arkansas-a khaw pakhat Hamburg-a piang leh seilian a ni a, chhungkaw harsa tak atanga rawn seilian niin, unau dang 11 lai a nei. Pippen hi a pi in hnung lama basket an neih atanga basketball khel tan a ni a, a unau te nen inkhel thinin, an inel thin hle a, a mah a tum a ruh em em bawk nen, NBA player awm tawh zawng zawng zinga player ropui ber pakhat a ni pha.

Pippen-te hi chhungkaw harsa tak an nih thu kan sawia, chu mai ni lovin a pa chu stroke avangin a kal thei lova, wheelchair-a a awm ngaiin, tawng lamah pawh hatsatna a nei a, chu mai la ni lovin, Pippen-a u mipa pakhat chu an school-ah intipalhin, a zenga, ani pawh hi wheelchair-a awm ngai niin, an chhungkuaah wheelchair-a awm ngai pahnih an kawl.

Pippen hian in a chhuahsan hlek tawh chuan basketball khelh bak a rilrua a awm ngai loh thu a sawia, American basketball player hlui Julius Erving, Dr.J tia hriat lar chu a mi ngaihsan leh entawn thin em em a nih thu a sawi bawk.

An chhungkua an harsat em avangin college a kal thei lova, a tan basketball lamah chance a tlem viau anga a lan laiin, scholarship a hmuh hlauh avangin University of Central Arkansas-ah a lut ta a, heta tang hi chuan nasa em emin basketball lamah hma a sawn a ni ber.

College lamah a chet tha em avangin Pippen hi kum 1987 NBA Draft-ah a lut zuia, hetah hian no.5 pick niin, Seattle SuperSonics chuan an la a, mahse Bulls lam hian Olden Polynice nen an trade pui. Pippen-a’n Bulls a zawm tirh hian rookie angin MJ aia a that tur thu a sawia, inrintawkna a nei lian hle a, MJ em chu pha lo mahse MJ-a tan chuan Batman-a’n Robin a mamawh ang hial a ni chho ta a ni.

Pippen leh Bulls te hi kum 1991 khan kum sarih chhung atan an inrema, hemi hun chhung hian Pippen hian $18m hlawh tur a ni a, mahse a that ang aiin a hlawh hi tlem tak a ni a, player underpaid ber a tih theih awm e. Chicago Sun-Times-a an ziaktu lar Rick Telander chuan kum 1991-a Bulls nen an inremna zat let kua emaw let sawm vel emaw lai hlawh phu niin a sawi nghe nghe.

A sum lakluh atang hian Pippen hian a nu leh pa te chu in thar a sak saka, thla tin pawisa a pe bawka, nasa takin a naupan laia harsa taka a mah lo enkawl tu a nu leh pate chu theih ang tawkin a tanpui let ve.

97-98 season kha Pippen-a contract neiha season hnuhnung ber a ni tawha, hetah hian Pippen hian hlawh sang zawk a duh avangin Bulls hotute nen pawh an inhmuthiam lo chho hle. 97-96 season zawh hnu nipui chawlh laiin, Pippen hian a ngalrek veilama hliam a neih chu a zai tir lawk duh lova, nipui chawlh nuam taka hman zawh hnu, season thar tan dawn hnaih lamah a hliam chu a zai tir chauh.

Pippen hian a hliam hi a zai tlai tir luia, hei hi Bulls hotute a runluihna ni berin, contract hmui zawk a ngiatna hmanrua a ni a, a tum ang ngeiin season bul pawh a tan hman ta lova, hetah hian Bulls-in Pippen an mamawh zia a lang zual hle tih theih a ni.

Hetianga Bulls hotute a runluih avang hian an inkar a chhe zual zela, Bulls general manager Jerrey Krause pawh tawngchhuakin, an player zingah tu mah chu trade thiang lo an awm loh thu a sawia, Pippen pawh chu la ui hle mahse a tul chuan an trade hreh loh thu a sawia, hei hian Pippen chu tithinurin, 97-98 season tan hma hian trade chhuah nih a ngiat ta nghe nghe a, Bulls tana inkhelh a tum tawh loh thu a sawichhuak bawk.

Bulls hian Pippen-a tel lovin season bul an tan ta ngeia, a zawna vawi hnih champion lai ni siin an game hmasa ber paliah an tlawm nghala, point 100 score tlin an nei lo bawk. Pippen hian season bul tan hman lo tura a inzai tir chung hian khatih hunlaia Bulls coach Phil Jackson erawhin Pippen hi a dem loh thu a sawia, a hlawh chungchanga a lungawi lo chu Jackson hian a hriatthiampui hle niin a lang.

97-98 season-a an game nganaah Bulls hian Los Angeles Clippers an hmachhawna, Clipper hi hetih hunlaia team chhe ber zinga mi ni mahse champion lai Bulls hian an khelhpui hleithei lova, mahse a hnuah erawh MJ chu rawn che in, he inkhelah hian point 49 score-in Bulls a chakpui.

Episode 2-ah hian MJ-a naupan lai tih lan tel a ni a, ani hi Wilmington-a seilian a ni a, The Last Dance interview-ah MJ hian a naupanlai hian Wilmington-ah vunrawng inhmuhsitna (racism) a hluar em em thu a sawia, mahse hei hi a mah infuih nan leh intihchak nan a hmang ta zawka, racism hluar em em tlanchhiatsan nan MJ hian sports a hman thu a sawi.

Bulls-in 85-86 season-a an game thumnaa Golden State Worriors an hmachhawn tumin, NBA Rookie of the Year ni lai MJ hi na takin a inhliama, a kephah veilam ruh a ti tliak. College a kal lai atanga inhliam avanga game khelh loh la nei ngai lo MJ hian Bulls-a a season hnihnaah hian a keruh tliak avang hian game 64 ngawt a khelh theih loh phaha, MJ hi a awm thiam lovin, rawlthar thaza rual a la ni bawk nen inkhelh a chak zek zek.

A inkhelh theih loh chhung hian MJ hian Bulls hotute hnenah college-a luh leh a dila, phalsak niin, college-ah hian a rukin MJ hi a inkhel thina, a tirah one-on-one in inkhel phawt mahse two-on-two ah kai chho vin, three-on-three a khel chho zela, a hnuah chuan game pangngai hial a khel leh theia, hetianga a inkhelh leh hi Bulls lamin an hriatpui lo. Hetianga ruka a inkhelh leh hnua Bulls-a a kir leh hnuah MJ-a ke tliak lam tha (muscles) te chu a ke tliak lo lam aiin an chak zawk tih hmuhchhuah a ni a, Bulls hotute pawhin mak an ti hle.

MJ hi a la dam fel chiah loh avangin a inkhelh leh nghal mai chuan inhliam lehna chance 10% a neih thu daktawr lamin an sawia, a inhliam lehna chance hi chhe hle mahse a inhliam leh a nih chuan a career tawp ngei tura ngaih a ni thung.

Hetiang avang hian Bulls hotute lam chuan MJ hi an la inkhelh tir ngam lova, MJ erawh inkhel chakin a za sek bawk si a, a tawpah inremna neiin, half khatah minute 7 chhung a inkhelh an phalsak ta ringawt. Inhliam lehna chance awm mahse MJ hian a eng zawngin thil a thlir tlata, “miin no (glass/cup) chu a chanve a ruak anga an hmuh laiin kei chuan no chu a chanve in a khat lo angin ka hmu,” a ti.

85-86 season hian Bulls chuan playoffs an lut hrama, playoffs ah hian team tha tak Boston Celtics an hmachhawn a, Bulls hi playoffs paltlang zo lo zawkah tang mahse playoffs inkhela player langsar ber leh tha ber a ni. Celtics nena an playoff game hnihnaah phei chuan MJ hian point 63 ngawt score-in, hei hi NBA playoff game pakhata, player pakhatin point a score hnem ber record ding lai a ni nghe nghe a ni.