22 May 2020 07:54

bakteaJr.

Mizo tlangval

The Last Dance: Episode 1

The Last Dance episode hmasa ber hi a hmuhnawm nghal hle a, episode 1-ah hian kum 1997-98 NBA season tan hmaa Chicago Bulls organization chhunga inrem lohna awm a langa, Michael Jordan-a’n Bulls a zawm dan te leh a lar zia te pawh langin, 1997-98 season tan hmaa France-a exhibition tournmanet-ah Bulls an tel chungchang te a lang ber.

97-98 season tan dawn hian Bulls hi a hma kum 7 chhungin NBA champions vawi nga an ni a, champion lai ni chungin season tan dawn mahse Bulls neitu pa ber Jerry Reinsdorf leh Bulls genaral manager Jerry Krause-te chuan an team-a player tha zawng zawng deuh thaw chu an chuai tan tawha an ngaih avangin, season an khelh turah champion tum lutuk lem lova, team indin thar tumna rilru an nei a, hei hian Bulls-ah inrem lohna nasa tak a siam.

Bulls team-a player tha ber Michael Jordan (MJ) chuan team tih siksawi a tulna a hriat loh thu sawiin, champion lai an ni chung leh hnehna an chan reng laia player leh coach ni lem lovin team kaldan tur duan an tum chu a ngaihtheih loh thu a sawichhuak hial.

Bulls hian indin thar an tumna lamah NBA-a vawi nga anmahni champion pui tu; an head coach Phil Jackson chu rawih chhunzawm an tum lova, hemi chungchangah hian MJ chuan coach dang tana khelh a tum loh thu a sawichhuak nghe nghe a, Bulls chhungah inrem lohna nasa tak a thleng.

Bulls hian 97-98 season atan hian Jackson hi contract thar an ziahpui leh ta nge nge a, mahse eng ang pawhin chak zawn reiin, champion leh pawh nise Bulls hotute lam chuan Jackson hi 97-98 chhung bak rawih chhunzawm an tum loh thu an hrilh.

Episode 1-ah hian MJ hi college basketball atangin a lar chhuak tih kan hmu a, University of North Carolina chuan basketball programe kaltlangin MJ hi an laluta, MJ hi North Carolina-a kum thum a awm chhungin NCAA Championship-ah a chet that em avangin kum 1984 khan NBA Draft-ah a lut.

Kum 1984-a University of North Carolina a chhuahsan hian MJ hian school kal chhunzawm leh a tum thu The Last Dance-a an kawmnaah hian a sawia, mahse college-a an coach Dean Smith chuan professional career umzui tura a tih avangin MJ hi NBA Draft-ah a lut ta zawk.

1984 NBA Draft-ah hian MJ hi no.3 pick niin, no.1 pick hi Hakeem Olajuwon a ni a, ani hi Houston Rockets chuan an la a, no.2 pick hi Sam Bowie niin Portland Trail Blazers-in an thlang thung. Bulls hi Draft-a thlang hmasa ber tu ni ta sela chuan anni pawh hian Olajuwon hi an thlan ve ngei a rinawma, khatih hunlaia Bulls general manager Rod Thorn ngei pawhin interview-naa a sawi danin theih sela chuan Olajuwon hi a thlan ve ngei tur thu a sawi nghe nghe.

1984 Draft zawh hian MJ hi USA tan Olympic khel turin a chhuaka, USA hian gold medal la in, MJ hi a langsar bera, Rod Thorn chuan NBA Draft hi Olympic hnuah neih ni ta sela chuan MJ an chan a rin loh thu leh, Olympic chu Draft hnua neih a ni chu an vanneih thu a sawi.

1984 Olympic zawh hian MJ hian Bulls chu pre-season atan a zawma, hemi hunlai vel hi USA-a cocaine leh ruihtheih thiil dang a hluar zual lai tak a ni a, MJ-a team-mate te pawh an inhnamhnawih vek. MJ erawh hetiang kawngah a inhnamhnawih ve duh lova, cocaine leh drugs dang chu sawi loh; mei pawh zu lovin, zu pawh a in ngai lova, a team-mate te tih ang a tih ve duh loh avangin a mal thu a sawi lang bawk. 1984-a Bulls a zawm hian MJ hi a che tha nghala, a game thumna vel atangin Bulls team chuan an zinga player tha ber a nih thu an hre nghal niin sawi a ni nghe nghe.

97-98 season tan hma hian sawi lan tawh angin Bulls team hi France-ah exhibition tournament-a tel turin an zina, hetah hian MJ-a lar zia a langa, a mah leh Bulls team hi an chhuahna apianga mipuiin an umzui dul dul reng.

Episode tawp lamah 97-98 season-a Bulls-in an game hmasa ber an khelh dawn a langa, an game hmasa ber khel tan hman lovin episode a tawp.

Episode 1-ah hian MJ-a hmasawn chak zia leh tha bik zia kan hmu a, mahse hetiang ni thei tur hian man pe lo a ni hauh lo. MJ hi midang zawng aiin a thawkrima, ruihtheih thilah a inhnamhnawih ve lova, midang te peih chin bak a pelh vang chauha midang te chunga awm thei a nih zia Episode hmasa berah hian kan hmu.

The Last Dance hi miniseries niin Episode 10 a awma, Episode khat hi minute 50 vel sei thui niin, article-ah engkim ziah sen a ni lova, en ve hman lo leh rokhawlhna hrang hrang avanga en thei lo te'n a tlangpui an lo hriat ve theih nan article hi ziah a ni tih min lo hriatsak ula, kim lo tak chungin a tlangpui theih ang tawka tarlan a ni.