Nimin Thawhlehni khan UFC Flyweight leh Bantamweight champion lai Henry Cejudo chuan UFC hmeichhe Flyweight champion lai Valentina Shevchenko chu a cho thu tarlan a ni tawh a, hmeichhe flyweight champion lai Shevchenko chuan zam miah lovin Cujodo a chhang let ve nghal.

Cejudo hian interview a neihnaah Shevchenko hi chhovin, “Triple C, champion gold lak vek hi ka duhthusam a ni a, Las Vegas-a chawlh ka hman laiin hetiang rilru hi ka nei chho. Tunlai fighter ah chuan Valentina Shevchenko-i aia tumpuite hnehsawh an awm kher lovang. MMA khawvelah chuan Shevchenko-i hian a tumpuite a hnehsawh ber maia, champion kawnghren a kawl lai hi chhuhsak ka chak takzet a ni. UFC record-a la awm ngailo, mipa leh hmeichhe inthliarna awm lova champion pahnihte insualna tur a ni dawn a, Shevchenko, kan insual ngei a ngai, " a ti.

Shevchenko chuan Cejudo hi chhangletin, UFC Flyweight leh Bantamweight champion lai hi fimkhur turin a chah. ESPN lamin Shevchenko hi an kawmnaah hemi chungchang hi sawichhuah a ni a, Shevchenko nuih hi a za hle nghe nghe.

Cejudo-a’n a chona hi a lo hmuh ve tawh leh hmu ve loh chungchang zawhna chhang Shevchenko chuan, “A thil sawi kha keipawhin ka lo hmu ve chianga, a thil dilah a fimkhur a ngai hle. A thil dilah a fimkhur loh chuan he fight hi ka thlen tir tak tak anga, a belt kawl lai zawng zawng a hloh phah dawn a ni,” a ti.

Cejudo hi mi tam tak chuan a uangah an ngaihsak a, mahse Shevchenko chuan a uan leh uan loh a hriat loh thu a sawi a, a uang lo a nih pawhin a hlauh loh thu a sawi. Shevchenko chuan Cejudo a uan leh uan loh chungchang zawhna chhangin, “A uang em ka hre lova, a chhan chu heti ang kawngah hian a ti tak tak duh leh mai chuan ka ring.

“A ti tak tak a nih chuan a thil dilah fimkhur se ka duh a, eng mah octagon chhungah hian hlauh ka nei lo. Cejudo-a thil sawi ka hriat tirh khan ka nuih a za em em a, min lawmpuina thu a sawi dawn emaw tih laiin khati ang zawng khan a sawi ta zawk a ni,” a ti bawk.