UFC Flyweight leh Bantamweight Champion Henry Cejudo-a chuan UFC hmeichhe flyweight champion Valentina Shevchenko insual puiah a cho thu a sawi chhuak . A sawi zelnaah UFC record-a la awm ngailo mipa leh hmeichhe champion insual theihna awm tawha champion hmasa ber anih thu a la sawi ta deuh deuh.

Cejudo-a hian tunhnaia interview a neihnaah tunhnai lawka UFC Fight Night neih zawh taka harsatna lian tawk lova a vawi hnihna atana champion kawnghren humhim thei Valentina Shevchenko a cho thu hi a sawi nghe nghe. A sawi zelnaah, "Triple C, champion gold lak vek hi ka duhthusam, " a ti zui.

Cejudo-a chuan, " Las Vegas-a chawlh ka hman laiin hetiang rilru hi ka nei chho. Tunlai fighter ah chuan Valentina Shevchenko-i aia tumpuite hnehsawh an awm kher lovang. MMA khawvelah chuan Shevchenko-i hian a tumpuite a hnehsawh ber maia, champion kawnghren a kawl lai hi chhuhsak ka chak takzet a ni. UFC record-a la awm ngailo, mipa leh hmeichhe inthliarna awm lova champion pahnihte insualna tur a ni dawn a, Shevchenko, kan insual ngei a ngai, " tiin social media-ah a inhrosa nasa hle.

Cejudo (15-2 MMA, 9-2 UFC) hian social media kaltlangin midang cho a hrat hrim hrim a. Tunhnai maiah pawh featherweight fighter ni thin, bantamweight division-a rawn khel chho tur Frankie Edgar a cho thu a sawi tawh bawk.

Bantamweight leh flyweight champion, Olympic gold medallist Cejudo-a hian flyweight number 1 contender Joseph Benavidez, bantamweight contender rothap tak pahnih Aljamain Sterling leh Petr Yan a hmachhawn a beiseiawm viau laiin, UFC 238 neih zawh taka Marlon Moraes technical knockout hmanga a hneh hnuin Hall of Famer Urijah Hall leh Bantamweight Champion hlui pahnih Dominick Cruz leh Cody Garbrandt insualpui a chak thu a sawi a, sum tamna lam anih dawn avangte pawh a ni mahna.

Tun dinhmunah erawh Cejudo-a hian a taksa a inhliam avangin kumin chhung chuan Octagon chhungah a inlan thei dawn lova, heti chung hian social media kaltlangin a invaupung nasa hle thung.