Inhliam Pogba, Zlatan leh Rojo te an kir leh ta, Fellaini pawh a fit tha leh tawh bawk. Manchester United chuan season tira an game mawi tak ang kha an rawn khel leh thei dawn ta niin a lang.
Inrinni zan khan Old Trafford-ah Newcastle United an mikhual a, September thlaa inhliam Pogba chu Mourinho chuan Starting XI-ah a dah. Hun tawp dawn lamah Zlatan Ibrahimovic a lut bawk, 4-1 in Manchester United chuan Newcastle United an hneh ta a ni.
Manchester United tan Martial, Smalling, Pogba leh Lukaku ten goal an khung a, Newcastle tan Gayle chuan goal khat a khung bawk. Paul Pogba chu man of the match-a thlan a ni a, United game-ah nasa takin danglamna a thlen a, chance pawh an insiam hnem phah hle bawk a ni.
Manchester United 4-1 Newcastle United
(Martial 37', Smalling 45+1', Pogba 54', Lukaku 70') (Gayle 14')
PLAYER RATINGS
Manchester United: De Gea 7, Valencia 7, Lindelof 5, Smalling 7, Young 8, Matic 7, Pogba 9, Mata 8, Rashford 7, Martial 8, Lukaku 7. Subs: Fellaini 6, Herrera 6, Ibrahimovic 6.
Newcastle: Elliot 6, Yedlin 7, Lejeune 6, Clark 6, Manquillo 6, Ritchie 7, Hayden 6, Shelvey 7, Murphy 6, Joselu 7, Gayle 7. Subs: Diame 5, Aarons 6, Mitrovic 6.
Manchester United hian a tir atangin an nawr nghal a, right back leh left back te pahnihin na taka an nawr pui avangin Newcastle chuan counter attack hmangin an nawr thut thut, Magpies chuan goal an khung ta nge nge. Yedlin chuan mual dinglamah ball chak takin a tlanpui, box chhunga awm Gayle tan a pe, ani hian cool takin a pet goal, mikhual Magpies chuan hma an hruai ta tlat mai. Hemi hnu chiah hian Murphy chuan Newcastle goal hnihna a khung teuh hle bawk, box dinglam atanga a shot chu a out chiah chiah.
United chuan an game pangngai an khel chhunzawm zel a, 37 mins-ah Martial hmangin an siphurh an rul ta nge nge. Pogba chuan box dinglam sirah ball mawi takin a chawk kual, a vawrh a, far post-a lo awm Martial chuan bottom corner-ah mawi takin a tauh goal. First half tawp hma hret 45+1 mins-ah Smalling chuan United hmahruaina goal a khung a, mual veilam sir atanga Young cross tha zet chu far post atangin Smalling hian a tauh goal. Hemi hnu chiah hian Newcastle chuan an siphurh an rul teuh hle a, Hayden chuan Smalling a bum hnuah kawh zetin hnai set sawt atangin a shot, De Gea chuan a lo dang hman hlauh.
Second half tan tirah Lukaku cross chu Martial chuan goal-ah a chantir teuh hle, a chest thlak a pet zui hman ta lo a ni. Rei an khel hman lo, 54 mins-ah Pogba chuan United goal thumna a khung a. Mual dinglam sir atanga Lukaku cross tha zet chu Rashford chuan far post atangin a laiah a tauh let, hei hi Pogba chuan awlsam takin a pet goal ta a ni.
Newcastle United chuan an nawr leh thut thin a, Murphy box pawn atanga a shot tha zet chu De Gea chuan a lo beng per hman. 70 mins-ah Lukaku chuan United tan goal a khung leh ta nge nge a. Mual dinglam sir atangin ball a lalut a, Mata tan a pe, Mata chuan a kangin box chhungah a pe leh a, Lukaku hian hnai set sawt atangin kawh zetin a pet goal a. Match 7 lai goal khung lova a khelh hnuah goal hlu tak a khung ta a ni.
77 mins-ah season hmasa tawp lama inhliam Zlatan chuan Martial a rawn thlak a. January thlaa lo kir leh tura ngaih ni mahse beisei aiin a dam chak, November thla chawhnu lamah United tan a inlan leh thei ta. Goal pawh a rawn khung nghal teuh hle a, Matic cross tha zet chu a lo kungfu kick a, Newcastle goalkeeper Elliot chuan a lo save hman hlauh. Hemi hnu chiah hian Fellaini pawhin a tauh goal tep nghe nghe a ni.
United tana Pogba tangkai zia a lang chiang hle. Team tha leh tha lo an tum pawhin an midfield-ah harsatna an tawk thin. Pogba khelh tum hi chuan chance an insiam nual thin a nih kha, game a thunun a, Newcastle an hmachhawn tum hian an game flow pawh a dik thlap mai. Tunah chuan Pogba a lo kir leh tawh a, United chuan ngai an awh chho leh dawn ta niin a lang.
Tin, Zlatan Ibrahimovic pawh upa tawh mahse a theihna a la sang hle tih a hriat. Mourinho sawi ang khan 90 mins khel tur chuan a chhawr tlak tawh lohvang, chutih laiin second half vela lut atan chuan duhthusam a la ni chiang. Christmas leh kumthar vuakvet fixtures hautak lai takin United chuan squad an nei chhah dawn niin a lang a, United chuan hma lam an pan chho thei leh dawn ta niin a ngaih theih.