Zanin dar 11:30 hian Spain chuan Iran an hmachhawn dawn a, 2018 World Cup-ah chak ve ngei an tum hle dawn a ni.
Morocco hnehtu Iran chu Group B hmahruaitu an ni a, Kazan Arena-ah hian Spain chuan point 3 hmuh ngei an tum dawn a, an game hmasaah Portugal nen 3-3 a an inhnehtawk avangin point 1 chauh an la hmu a. Iran hian hun tawp dawnah Aziz Bouhaddouz goal hmangin Morocco an hneh a, an group-ah chuan point 3 hmu awm chhun an la ni.
Portugal nen an inkhelh tumin Spain star Diego Costa chuan goal hnih a thun a, zaninah pawh La Furia Roja tana langsar ber pawl a nih a rinawm a. Portugal nen an inkhelh tum khan a tawp lamah an thlak a, a lungawi hmel loh hle a. Costa hian coach Fernando Hierro hmaah a thiamzia leh minute 90 khel thei a nihzia lantir ngei a tum a rinawm.
Iran tan Russia rama khel Sardar Azmoun chu an rinrawl ber tur a ni ang a, qualifying-ah khan Sardar hian goal 11 zet a thun a. Russian Premier League club Rubin Kazan-ah Azmoun hian a khel mek a, zanina an inkhelhna tur hi an club stadium a ni.
Team Melli hian Morocco an hneh a, kum 20 chhunga a vawi khatna atan World Cup-ah an chak ve chiah a. Spain chu barakhaih theih ngei an tum dawn a, Carlos Queiroz-a pawlte hi an theuneu lo hle a, Brazil World Cup 2014 hnuah competitive match ah chak loh an la nei miah lo a. Qualifying-ah khan game 10 chhungin goal 2 chauh an chhuah a ni.
Iran chu 1966 hnua goal shot nei loa chak leh hmasa ber an ni a. An chakna goal hi minute 94 leh second 7 a Morocco player Aziz Bouhaddouz own goal vang a ni a, he goal hi June 2006 hnua World Cup goal lut tlai ber a ni.
World Cup-ah Iran hi European team lakah an la chak ngai lo a (5 loss, 1 draw), Spain hian Asian team hneh loh an la nei lo thung (Won 2, draw 2)
Queiroz chuan, “Spain hian khawvela player tha ber ber an nei a, technique lamah pawh an sang em em a, mahse chu ringawt chuan a chakpui thei bik lo a, chak tur chuan inkhelh phawt a ngai,” a ti a.
A sawi zelnaah, “Team tha tak, player pawh nei tha tak an ni a, mahse thunun an harsa duh a, keini chuan kan hriatthiam zawngin game kan khel dawn a, chiang sa engmah a awm lo,” a ti bawk.
Spain captain hlui Fernando Hierro chu World Cup tan hma ni hnih la awm khan Spain national team enkawl turin an ti thut a, an coach hmasa Julen Lopetegui chu Real Madrid nen an lo inbiak rem avangin an ban thut a ni.
Team pahnihte hian player inhliam an nei lo a, Hierro chuan David de Gea chu chhawr a tum a, Queiroz pawh hian Morocco an hneh tuma a player khelhtir te chu thlak kual vak a tum loh thu a sawi.
Referee: A. Cunha
Assistants: N. Taran, M. Espinoza
Fourth official: J. Bascunan
Potential Spain XI: De Gea; Carvajal, Pique, Ramos, Alba; Busquets, Koke; Iniesta, Silva, Isco; Costa
Potential Iran XI: Beiranvand; Hajisafi, Cheshmi, Pouraliganji, Rezaeian; Shojaei, Ebrahimi; Amiri, Ansarifard, Jahanbaksh; Azmoun