September ni 29, 2017 khan Aizawlah Mizoram Football Association leh 8one Foundation te chuan Young Legends' League (YLL) khuhhawnna an nei. YLL hi India ramah a vawi khatna a ni dawn a, kum 12 hnuai lam naupangte tana inelna league a ni dawn a ni.
He League hi AIFF chuan a pui dawn bawk a, 5-a-side football league niin, Mizoram state Champhai District-ah bul tan a ni ang. League khelh nana Champhai thlan a nih chhan chu Champhai hi naupang talent nei tha tak tak tamna a nih vang a ni. Tunah hian Champhai atanga chhuak India rama footballer tha tak tak Lalthuammawia Ralte, Lalchhawnkima, Lalruatthara leh Robert Lalthlamuana te an awm mek.
He League hi match 500 chuang awmna a ni dawn a, season khat hi thla ruk atanga thla riat chhung vel tura ruahman niin, India rama Football league season rei ber a ni dawn. Team pakhatin season khat chhungin match 30 emaw vel an nei dawn a, team khatin squad mi 7 awmna an nei vek dawn a, player panga bakah substitute pahnih an ni ang.
YLL khuhhawnna programme-ah hian MFA honorary secretary Pu Lalnghinglova Hmar chuan, "The Young Legends' League hi naupang kum 12 hnuailamte inelna tur a ni dawn a, hei hian nasa takin inkhelh thiamna lamah a pui dawn a ni. Naupangte hian an hun tam tak ball pet nan hmang se kan duh a, chu chuan techniques leh skills lamah a pui dawn, hei hi football thiamna tak tak neih nan chuan a tha ber niin kei chuan ka ngai. MFA hian player naupang talent nei tha te phochhuah hi kan duh dan a ni a, hetia inphochhuahna hun kan siam sak chuan nasa takin hma an sawn ngei dawn bawk a ni," tiin a sawi.
MFA leh 8one Foundation te hian YLL atan hian kum 10 chhung atan inremna thuthlung an ziak a, kum 2027 thleng Champhaiah hian he league hi khelh a ni dawn a ni.
8one Foundation founder Varun Achreja chuan, "Kan tum ber chu he YLL hmanga naupang tha tak tak an lo chhuah theih nana Champhai mipuite nawr chhuah a ni a. Chu chuan zirna kawngah te, ei leh in tha chungchangah leh hriselna kawngah team-te tan rahtha a thlen ngei dawn a ni," tiin a sawi. AIFF Head of Player Development Richard Hood pawhin he Baby League hi a phurpui hle a, Champhaia he league nghah a ni tur pawh hian rah tha tak a chhuah ngei a rin thu a sawi bawk a ni.
Player naupang dawm kanna kawngah hian MFA leh 8one Foundation hian ISL Club North East United FC an thawhpui bawk a, player naupang dapkhawm kawngah Champhaiah hian tawnhriat an lo nei teuh tawh nghe nghe a ni. NEUFC neitu John Abraham chuan he Baby League hi an support thu sawiin, Guwahati, Shillong, Imphal leh tunah Champhaiah huang an zauh tak zel avanga a lawm thu a sawi bawk.
YLL hmasa ber hi Chhangphut field-a tan a ni dawn a, a season khatna hi November ni 11, 2017 atanga July ni 23, 2018 chhunga neih tura ruahman a ni. Match khat hi minute 40 atanga minute 60 chhung vel khelh tura ruahman a ni a, kar tin league hi neih tura ruahman a ni bawk.
Professional Football kal kawnga Mizo zinga sulsutu S. Malsawmtluanga chuan, "Hetianga inzirna tur buatsaih a ni dawn ta hi player naupang te tan chuan thil ropui tak a ni a, MFA leh 8one te hmalaknaah ka lawm tak zet a ni," tiin a sawi. Tunlai India striker tha ber ami Jeje Lalpekhlua chuan, "Ka awmna state atanga Football chanchinthar chhuakah chuan a lian ber a la ni hial awm e. Keini kha chu kan naupan lai khan football zirna tur mumal a la awm lova, Mizo naupang ten kum 12 hnuailam an nih lai atanga hetiang inelna an neih chhoh tan chuan Indian football-ah hmabak eng tak an nei chiang a ni," tiin a sawi bawk.
YLL hian Europe leh South America-a naupangte football zir dan zulzuiin hma an la a, Lionel Messi hi kum 4 a nih lai atangin Argentina-a Grandoli-ah bul a tan. Cristiano Ronaldo hian kum 7 mi a nih lai atangin Andorinha (Portugal) ah bul a tan a, Zlatan Ibrahimovic hian kum 6 a nih lai atangin Malmo (Sweden)-ah bul a tan bawk. Lionel Messi hian kum 13 mi a nih (Barcelona a pan hma)-in heng Baby League angah hian goal 500 chuang a khung hman nghe nghe a ni.