Central YMA leh Mizoram Football Association (MFA) tangkawpin an buatsaih TT Royte Trophy Inter Branch YMA Football Tournament chu June ni 19, Thawhlehni khan semifinal 1st leg khelh a ni a, inkhel hmasa zawk Ramhlun South leh Chhinga Veng te 1-1 in anin hneh tawk a, inkhel hnuhnung zawkah Chanmari chuan 2-0 in College Veng an hneh thung.

Semifinal 2nd leg hi June ni 21, Nilainiah khelh leh tur a ni a, chawhnu dar 1:00 PM-ah College Veng leh Chanmari ten an khel hmasa ang a, dar 3:30 PM-ah Ramhlun South leh Chhinga Veng ten an khel thung ang.

Ramhlun South 1-1 Chhinga Veng

(Malsawmfela 23') (Lalnunsanga 86')

Team pahnih te anin nawr tawn zak zak hnuah Ramhlun South chuan an chance neih hmang tangkai hmasa zawkin minute 23-ah Malsawmfela chuan goal hmahruai a khung a, Chhinga Veng chuan an siphurh sut tumin nawr let mahse goal erawh an thun mai thei lo. Ramhlun South chuan 1-0 a hmahruaiin chawlh lawk an hmang.

Second half-ah Chhinga Veng chuan an siphurh sut ngei tumin an nawr let thung a, hun tawp nan minute 4 ala awmin mual dinglam sir a tang a S Malsawmtluanga (Mama) goal shoot tha zet Ramhlun South keeper Hmingthantluanga namper chu Lalnunsanga chuan pet goal-in an siphurh a rul a, 1-1 in anin hneh tawk ta a ni.

College Veng 0-2 Chanmari

(Rosangliana 27', Lalhriatpuia 90+4')

inkhel hnuhnung zawkah Chanmari chuan 2-0 in College Veng an hneh thung a, goal lut te hi first half-a lut an ni. Inkhel tan a ni a, team pahnih te anin nawr tawn zak zak a, clear chance erawh an nei thei lo ve ve thung. Minute 19 an khel hman tihah chhumzing vangin inkhel chawlh lailawk a ni. inkhel chhunzawm leh a nih hnuah Chanmari chuan an hun tha neih hmang tangkai hmasa zawkin minute 27-ah mual veilam sir a tang a Sawmtea Zote ball vawrh luh tha zet chu box chhunga awm Rosangliana chuan tauh lutin goal hmahruai a khung a, hun tawp dawn injury time-ah Lalhriatpuia chuan an goal hnihna khungin Chanmari chuan 2-0 in hnehna an chang ta a ni.

June 21, Nilaini semifinal 2nd Leg Fixtures:

01:00 PM College Veng vs Chanmari

03:30 PM Ramhlun South vs Chhinga Veng

(adsbygoogle = window.adsbygoogle || []).push({});