Roger Federer leh Marin Cilic te chuan an khingpui ve ve hnehin Wimbledon 2017 final an lut.

Kum 35 mi Swiss Roger Federer hian 7-6 (7-4) 7-6 (7-4) 6-4 in 11th seed Czech Tomas Berdych a hneh a, set khat pawh hloh lovin final a lut ta, Roger Federer hian a vawi 11 nan Wimbledon final a lut ta bawk a ni.

Croatian Marin Cilic chuan American 24th seed Sam Querrey chu 6-7 (6-8) 6-4 7-6 (7-3) 7-5 in Centre Court-ah a hneh ve bawk a, kum 2014 US Open-a a champion hnuah kum 28 mi Cilic hi a vawi khat nan Major final a lut leh ta a ni.

Federer hian Grand Slam final a vawi 29 nan a lut a, kum 1974 khan kum 39 mi niin Ken Rosewall chuan Wimbledon final a lut, ani kha Wimbledon final lut thei upa ber a ni a, Roger Federer hian a dawt ta a ni.

"Final ka lut leh thei hi ka tan chuan a hlu kher mai. Centre Court-a hun ka hmang leh tur hi ka lawm a ni," tiin Federer chuan a sawi.