Arsene Wenger chuan Lacazette leh Aubemayang a neih hnuah pawh foward dang a la dap chhunzawm zel niin Daily Mail chuan a tarlang.

Arsenal chuan nipui bazarah Lyon forward Nabil Fekir chu £45million vela lei an tum dawn nia report a ni a, Nabil Fekir hi kum 24 mi niin kumin World Cup-ah France team-a koh a nih ngei pawh a rinawm.

Ningani zana Europa League match-ah Lyon chuan 3-1 in Spanish Club Villarreal an hneh a, kha match-ah khan Nabil Fekir hian goal a khung nghe nghe a ni.

Arsenal hian nikum nipui bazarah khan Lyon atangin Alexandre Lacazette chu £52.7million in an lalut tawh a, tunah hian an foward dang chhuhsak an tum leh mek nia report a ni.

Arsenal hian season tharah Champions League an khel thei dawn nge dawn lo a la hriat loh. Premier League table-ah 6-na an ni mek a, Champions League khelh theihna spot chu point 8 in an thlau mek. Tunah hian game 11 chiah khelh tur a awm tawh, league atanga UCL khel thei dinhmuna inhlankai chu thil hautak tak a ni tawh dawn.

Europa League-ah an champion a nih chuan Champions league an khel thei dawn bawk a, an champion dawn nge dawn lo a la hriat loh, tunah hian Europa League last 32-ah club tha tak tak an la awm nual bawk si, Champions League an khel phak lo hlauh a nih chuan player tha an hip lo sawt dawn niin a lang.