World Anti-Doping Agency (WADA) chuan kum 1980 leh kum 1990 chhoah khan Chinese infiammi sing chuangin damdawi hman phalloh an hmang tih sawithawm a awm avangin China an chhui dawn.

China Olympic team doctor ni țhin Xue Yinxian chuan kum 1980 leh kum 1990 chhoah khan Chinese infiammi tam tak chuan damdawi hman phalloh an hmang tih German TV hnenah a sawi a, amah pawh hi Gymnast ho hnena pek tur an tih damdawi a pek duhloh avangin an ban tih a sawi bawk.

Xue hian infiammi kum 11 vela naupangte pawh damdawi hman phalloh pek vek an ni tih a sawilang a, khatih hunlaia an medal lak zawng zawngte kha damdawi hman phalloh an hman vanga an dawn vek niin a sawilang tel.

WADA chuan Xue-i thusawi hian an beng a thleng tih sawi mahse kum 30 lai liam tawh ami chu chhui a awlsam dawn lo tih an sawi a, kum 2003 ațang khan WADA code siam a ni a he code bawhchhiate hi kum sawm chhung hrem theih an ni.

German TV-in an kawmnaah Xue chuan damdawi hman phalloh an hmann hi football, athletics, swimming, volleyball, basketball, table tennis, diving, gymnastics leh weightlifting-ah te a ni tih a sawi lang bawk.

China hi tun thla tir lam khan Gymnastics-a damdawi hman phalloh an hman avangin kum khat chhung hrem an ni a, an rual hian damdawi hman phalloh hmang ve tho ram pariat - Russia, Armenia, Azerbaijan, Belarus, Moldova, Kazakhstan, Turkey leh Ukraine-te pawh hrem ve nghal an ni.