Mizoram Super League season 3 chu April ni 4, Thawhlehni zan khan khelh chhunzawm leh a ni a, Zarkawt BCA chuan 67-57 in Mission Veng Vikings an hneh a, BCA match thum khelh tawhin vawi thum an chak ta a ni.
Zarkawt BCA tan state pawn player pahnih Amritpal Singh leh Yadwinder Singh te chuan an thiamna pholang lehin, Amritpal SIngh chuan vawihnih lai a dunk a ni. Henry Lalramngaihawma, Zonunsanga, David Lalruatfela leh Dennis Lalmuanpuia te an thawh hlawk hle bawk.
Mission Veng Vikings hian Rikin Pethani leh Ronald March te mipui hmuh theih turin pho chhuak mahse beisei an pha lo. Moses Zoremmawia, Lalrina Renthlei leh Zonunsanga te thawh hlawk viau mahse, Zarkawt BCA dang turin an thawh hona a tha tawk lo thung.
Zarkawrin bul an tan tha zawk a, First quarter a zawh chuan BCA chuan 18-13 in hma an hruai. Second quarter-ah Vikings player Ronald March rawn pen chhuak ve thungin, point 12 lai a score, mahse hei hi BCA khum tur chuan a tawk lo. BCA lam bawk chu hmahruaitu zawkah tangin langsar bik awm lovin an khel tha tlang vek.
Third quarter-ah BCA hamhruaitu an ni zel a, Henry Lalramngaihawma, Yadwinder Singh leh Zonunsanga te an thawh hlawk hle a, Amritpal Singh chuan a dunk leh bawk. Vikings tan Moses Zoremmawia thawh hlawk hle mahse, Zonunsanga leh Ronald March ten an thlawp tha tawk lo a, turnover an ngah bawk. Third quarter a zawh meuh chuan BCA chuan 58-46 in hma an hruai tawh.
Quarter hnuhnung berah Vikings tan Ronald March leh Rikin Pethani te inlan mahse, danglamna an thlen thei lo. BCA tan Amritpal Singh leh Yawinder Singh te inlan ve bawk a, dan rual lohin an rawn chetha leh, Zonunsanga che a hmuhnawm leh hle bawk. Hun a tawp meuh chuan BCA chuan 69-57 zetin BCA chuan hnehna an chang ta a ni.
Zarkawt BCA tan Amritpal Singh hian vawihnih a dunk avangin a langsar a, BCA chakna erawh mizo player an ni kan ti thei awm e. Zonunsanga hian point 15 a score a, 3 points vawi hnih rebound vawi 6 lai a la a, assists vawi 4 a nei bawk. Henry Lalramngaihawma chuan point 15 score-in 3 points vawikhat leh rebound vawi li a nei ve bawk. BCA hian tun season-ah hian hneh loh an la tawng lo a, match thum khel tawhin solid point an nei a ni.
Inkhel Reporter : PC Lala