Bayer Leverkusen winger Leon Bailey chuan khawvela tlan chak ber Usain Bolt chu footballer tha tak ni thei a nih thu a sawi.

Leon Bailey chuan Usain Bolt chuan footballer tha deuh ni turin thiamna bakah tumruhna a neih that thu a sawi a, professional footballer nih a chakna chu a tumruhna avangin a puitlin thei ngei a rin thu a sawi a ni.

Vawi 8 ngawt mai Olympic champion lo ni tawh Bolt hian thla hmasa khan ni hnih chhung chu Borussia Dortmund training a zawm a. BVB coach Peter Stoger chuan football contract pangngai a ziah hmain Bolt chuan hmabak a la nei nual tih a sawi a. Hetih lai hian Bailey chuan Bolt hi professional footballer ni turin inpeih thawkhata a hriat thu a lo sawi ve thung a ni.

Usain Bolt ang bawka Jamaica lam mi Bailey chuan, “Bolt nen kan inbia a, Borussia Dortmund training a zawm chungchang te kan sawi dun a, nuam a tih thu a sawi,” a ti a.

“Training kha nuam a tih viau rualin duh anga a fit loh thu a sawi a. Professional footballer nih a chakna hi a reh thei lo a, theihtawp chhuaha a suangtuahna tihpuitlin thei tluka chak a nei lo,” a ti bawk.

Kum 31-a upa Usain Bolt hian Dortmund training zawm tura kir leh a tum thu sawiin, a hma aia rei zawk training a duh thu a sawi tel a. Manchester United tantu Bolt hi June thlaa Soccer Aid in Old Trafford-a charity match an buatsaih turah pawh a tel ve dawn a ni.