Francis "The Predator" Ngannou hi September ni 5 ,1986 ah piangin, French leh Cameroon thlahpawlh a ni a, UFC Heavyweight Fighter 1 contender nihna a hauh mek. UFC 220 lo awm turah hian champion lai Stipe Miocic nen title fight an nei ang. Hmanni lawk khan khawvela hnek na ber record Kickboxer Tyrone Spong-a record khumin khawvela hnek na ber record a siam bawk.

Pian leh seilenna

Cameroon khaw lian lo tak Batie-ah piangin hetah hian panlai hun a hmang a, lehkha zirna (Education) mumal tak pawh a dawng lem lo. Kum 12 a nih chuan chhungkaw retheihna avangin quarry-ah a thawk lawp lawp thin. Heta tanga rei vak lovah misual rual (Gang) member atangin sawmna a dawng nawlh mai, nimahsela an sawmna a hnawl tlat thung.

Street fight lam erawh nuam a tih zawng tak a ni thung a,k um 22 a nih chuan boxing training a nei chho tan a, natna khirh tak a neih vang erawhin kum khat hnuah training a nei zui thei ta lo. Kum 26 a nih thleng chuan dam khawchhuah nan hna hnuaihnung tak tak a thawk ta a. A hriselna a lo that deuh takah chuan training mumal zawk neih beiseiin Paris lamah a pem ta a, harsatna nasa tak hmachhawn zui zelin chenna tur in pawh a nei zo lo thin a ni.

MMA a luhchilh tan dan

Ni khat chu MMA training-na hmunah a va kal a, pad show vel atangin a kutthlak natzia chu hmuhchhuah a ni ta a, MMA khel turin an sawm zui bawk. Heta tang hian MMA a luhchilh chho ta a ni. French Promotion 100% Fight-ah MMA debut a nei tan, a vawikhat khelhnaah hian a chak chiang hle bawk. Chutichuan organisation lian lo tak takah pawh fight a nei chhunzawm zel bawk a.

UFC debut

December ni 19, 2015 khan UFC-ah a vawi khat nan a fight ve, Luis Henrique chu 2nd round-ah TKO in a hneh. Fight a nei chho deuh deuh ta mawlh mawlh a, fight langsar zinga tawnhriat nei tha tak Anthony Hamilton chu first round-ah submission-in a hneh ta zel bawk a. Anthony Hamilton a hneh zan hian Performance of the Night a dawng nghe nghe.

Fight hmuhnawm tak a nih ngei beiseiin UFC Heavyweight Champion hlui Andrei Arlovski nen fight contract an sign leh a, round khat chhung lekin TKO-in a chak leh bawk. UFC 215-ah Champion hlui Junior Dos Santos hmachhawn tur a nih laiin Anjos-a'n damdawi hman phalloh a lo hman tih hriat a ni a, kha fight kha cancel a ni hlauh mai.

UFC 218-ah khawvela heavyweight fighter langsar ber zing ami Alistair Overeem chu first round-ah a knockout leh bawk a, knockout of the year-a thlan a ni nghe nghe. Rethei leh harsa tak ni thin mahse tunah chuan a huaisen leh tumruhna avangin sum tam tak a hlawhchhuak ta mek a, fighter tha ber zingah a rawn inhlangkai mek bawk a ni.

MMA lama a hlawhtlinna langsar zual te:

1) Two time Performances of the Night.

2) KO of the Year-Espn (Vs Alistair Overeem)

3) 2017 Breakthrough fighter of the Year (MMA Fighting)