Ningani khan UEFA's Control, Ethics and Disciplinary Body chuan Barcelona an hrem thu a puang a, Barcelona hian football-a politics kaihhnawih thil an phochhuah avangin UEFA chuan €30,000 a chawi tir ta a ni.
June ni 6, 2015-a Juventus nen Champions League final Berlin-a an khelh tum khan Barcelona fans tam takte chuan Spain atanga Catalan inlakhran an duh thu banners leh flags an tarlan bakah an auhla thlengin UEFA dan an pal zut a, hei vang hian UEFA chuan Champions League champions Barcelona chu a hrem ta a ni.
Catalunya vs Spain
Football avang hian History tam tak kan hriat phah zel a, History subject ngaina lo tak takte pawhin game an khelh avangtein History tam tak an hriat phah bawk. Football-ah pawh hian tunhma hun chhui let leh zelte a chang chuan a ngai thin dawn a nih hi, History subject tui lovin, hre hleithei lo mah ila, Football avang erawh chuan kan hriat loh tur turte kan hre ta zut zut reng a nih hi.
Catalunya hi Spain ram chhunga awm a ni a, Mediterranean tuipui-a Balearic Sea an tih depa awm a ni. Chhim lamah chuan France ram dep a ni a, Spain-in a awp behna hnuai atanga tal chhuah an chak em em. Catalunya-a chengte hi Catalan an ti a, FC Barcelona chu Football-ah khawvel deng chhuakin an hming a thang thin.
FC Barcelona hlawhtlinna hi Catalan mipuite chuan Spain awp behna hnuai atanga tal chhuah an duh zia tarlan nan an hmang chhunzawm bawk a. Hengte a nih vangin FC Barcelona, Catalunya , Catalan..etc tihte kan lam kan lam ve phah ta a nih hi.
Hmanah chuan Catalunya hi mahnia ro inrel, ram hrang, mahnia tawng hrang nei, dan leh hrai pawh a hrang veka nei an ni thin. Kum 1150 khan Petronilia, Queen of Aragon leh Ramon Berenguer IV te inneihin, Barcelona ram zau tak an siam a, an fate chu he ram hi an hlanchhawng zel a.
Chutih laiin 1707 khan Spain lal chak tak King Philip V chuan hmar lamah a ram a zauh chho zel a, 1707 khan Valencia a la a, 1714-ah Catalonia a la leh a, tichuan Spain ram zau tak chu a din ta a ni.
Catalan mipuite hian Spain awp behna hnuai atanga inlak hran hi an chak zek zek reng a, 1931 thleng khan Spain atanga inlakhran duh Catalan mipui te la awm mahse Spain chuan hneh takin he movement hi a hmet mit ta a ni.
Nikum khan Scotland chuan a ram chhunga mipuite chu Britain atanga inlakhran an duh leh duh loh vote a la a, hetah hian a tam zawkin inlakhran duh ta selang chuan Scotland chu Britain atangin an inla hrang tawh ang, mahse Britain-a beh a tam zawkin an la duh avangin Scotland chu Britain ram chhunga awm a la ni chhunzawm ta zel a ni.
Catalan mipui te pawhin hetiang deuh hian zalenna an neih theih mai beiseiin nikum khan nasa takin Barcelona khawpuiah chuan movement lian a awm nghe nghe a nih kha. Vawiin thlengin Catalan mipuite chuan Spain awp behna hnuai atanga tal chhuah an la chak a, khawvel hmuha inlakhran an duhna tihlan dan tha ber chu FC Barcelona inkhelh laia au chhuah chu a ni ta thin a ni.
Catalunya hian flag hran an nei a, chu chu a eng leh a pawl leh a var a ni. Chu chu Barcelona chuan away jersey rawngah an hmang nghe nghe. Nikum phei kha chuan Catalunya hi Spain atangin inla hrang ta selang, Barcelona leh Espanyol-te hian khawi league nge an zawm ang ? Tih thleng khan media te chuan an lo ngaihtuah a, thenkhatin France League an zawm ang te an ti a, thenkhat chuan La Liga-ah an la awm chhunzawm zel ang te an ti bawk. Engpawh nise tun dinhmunah hi chuan zalenna an la hmu mai dawn lo niin a lang a, hetih lai hian hetiang movement hi chu FC Barcelona supporter-te hian an la tih lan zel erawh a rinawm a ni.