India-in a thlen tur FIFA U-17 World Cup 2017 chuan ngaihven a hlawh chho zel a, FIFA leh Local Organising Committee (LOC) chuan Thawhțanni khan tournament khelhdan tur leh au hla tur an puang.

U-17 World Cup hi October ni 6 hian India ram khawpui pahnih - New Delhi leh Navi Mumbai-ah a rualin khelh hawn a ni dawn a, quarter-final chu Goa, Guwahati, Kochi leh Kolkata-ah te khelh a ni thung ang.

Semi-final pawh Guwahati leh Navi Mumbai-in an thleng dawn a, final chu India ramin stadium kan neih zinga lar ber Salt Lake Stadium, Kolkata-ah khelh tur a ni.

LOC Tournament Director Javier Ceppi chuan U-17 World Cup au hla (slogan) tur chu ‘Football Takes Over’ tih a ni tih a sawi a, ticket pawh an zuar chhuak thuai dawn tih a sawilang.

Navi Mumbai-a DY Patil Stadium-in Group A inkhel zawng zawng leh Round of 16 game khat a thleng dawn a, Guwahati-a Indira Gandhi Athletics Stadium-in Group E inkhel zawng zawng bakah Round of 16 leh quarter-final game khat ve ve a thleng dawn bawk.

New Delhi-a awm Jawaharlal Nehru Stadium-in Group B inkhel zawng zawng bakah Round of 16 game hnih a thleng ve dawn thung a, Kochi-a Jawaharlal Nehru Stadium-in Group D inkhel zawng zawng a thleng dawn a, Round of 16 leh quarter-final game khat ve ve a thleng dawn bawk.

Group C inkhel zawng zawng pawh Margao-a awm Fatorda Stadium-in a hui vek dawn a, Round of 16 game hnih leh quarter-final game khat a thleng bawk ang.

October ni 6 leh ni 28 inkara khelh tur U-17 World Cup hi Asian Football Confederation, CONMEBOL (South America), Oceania Football Confederation (New Caledonia and New Zealand), UEFA (Europe), CONCACAF (North and Central America and the Caribbean) leh CAF (Africa) ațang team 24-in an khel dawn a, July ni 7 hian Mumbai-ah Group draw neih a ni ang.

* Pic: AIFF