Arsenal manager Arsene Wenger chuan 3-0 a Chelsea an hneh hnuin tunhnaia an khelhțhat ber țum a ni tih a sawi a, an khelhdanah a lungawi bawk.

Gunners hian Inrinni zan khan Emirates Stadium-ah Chelsea hi mikhualin Alexis Sanchez, Theo Walcott leh Mesut Ozil-te goal khung hmangin hnehna an chang a, Antonio Conte leh anaute an dah 'NIL' hneh hle.

Inkhel zawh hnua an kawmnaah Wenger chuan, "Kan khelh tawh tam tak zinga kan duhthusam anga kan khelhchhuahna game pakhat a ni. Manager ang pawhin tum țum hi 'Ni duhawm tak' pakhat a ni bawk."

"Second half-ah kha chuan thil a inthlak danglam hret a first half-ah erawh kan thiamna tak tak kan lantir. Awmze neiin kan khel a, kan rang a kan chetphung pawh a dik. Khatianga khelh kha kan duh țhin. Tunhnaia kan khelhțhat ber a ni." tiin a lawm hle.

Arsenal hian kum 2011 hnua a vawikhat nan an hmelma Chelsea hi an hneh leh ta a, kum 1997 April thla hnua an hneh chian berna a ni bawk. ( www.inkhel.com)

Inrinni zana an chakna hian table-ah vawrh kangin pathumna dinhmun an hauh a, hmahruaitu Manchester City aiin point ngain an la hniam a City hian tun season Premier League-ah hnehloh an la nei lo.

Sawi chhunzawmin French manager Wenger chuan, "Kan khelhdan khan hmalam kan pan tih a lantir a, hmasawn theihna tur ala awm cheu tho. Hmasawn zel hi kan tum." tiin a sawi.

Result țha hlawhchhuak mahse Gunners hian khup hliam vangin an midfielder Francis Coquelin an chhawr tluan thei lo va, French midfielder hi minute 32-naah Granit Xhaka chuan a thlak.

Kum 25 mi hliam chungchang hi sawiin Wenger chuan, "Nikuma West Brom kan hmachhawn țuma a hliam ang chiah kha a nei leh. Engtiang taka na nge anih kan la hre lo va darkar 48 chhung nghah a ngai. In tuam bur chungin stadium a chhuahsan a ka ngaih chu a țha vak lo." tiin a sawi.

* Pic: Premier League