Central YMA leh Mizoram Football Association-in a buatsaih TT Royte Trophy : Inter Branch YMA Football Tournament chu May ni 16, 2017 khan Aizawla football ground hrang hrangah khelh tan a ni a, team 141 tel atang hian player tha tak tak kan la hmelhriat ngai loh an rawn chhuak leh nuk dawn.

Tun hma pawhin player naupang tha tak tak rawn invawrh chhuak an awm nawk thin, India ram kan la dai pawh loh avangtein tualchhung level-ah an thamral mai mai ta thin a. Kan kawng kan sat kaw tawh a, vawiinah chuan Football hi eizawnna tlak a nih tawh a ni.

India ram chuan Mizoramah hian Football talent tha tak tak a awm tih an hriat chian tawh avangin tun YMA Tournament hi player tha tak tak tan chuan kawngka pawimawh tak a ni dawn chiang e.

A hmasa berin Mizoram Premier League club-te chuan an player duh an lo thlang nalh nalh anga, Mizoram Premier League khelh hi a pawimawh zia kan hre tawh, MPL atanga India Top Flight league khel an tam ta hle mai. Mizoram Premier League hi player tha thlan nan an rawn hmang chho zel tawh dawn.

National-a Mizoram aiawha kal duh tan pawh YMA Tournament hi a pawimawh dawn em em a, trial chu an neihpui thin, hetih lai hian heng tournament hrang hranga player tha hi chu koh an ni fo a, Football kawngka zau taka hawn a nih tawh avang hian tun Inter Branch YMA Football Tournament hi chu kum dang zawng aiin a pawimawh kan ti thei awm e.