Fernando Torres chuan tun nipui bazara-ah a lo chawrchhuahna club Atletico Madrid chhuahsanin Japnese club Sagan Tosu a pan a, Japan lama a kal chhan hi Barcelona midfielder hlui Andres Iniesta vang a nih thu a sawi.

Season zawh hnu lawkah Barcelona chhuahnsanin Spain midfielder Andres Iniesta chuan Japanese club Vissel Kobe a zawma, Torres hian a hnung zuiin Japanese league-ah Spain player ropui pahnih hi an khel dawn a ni.

Kum 34 mi Torres hian Goal. com chu Japan a pan chungchang hrilhin , “Iniesta hian Japan lama kal a tum thu min hrilha, tluang takin thil a kal chho a, a duhnaah chuan a kal ta ngei a. Ka dinhmun min rawn hriatthiam puia, Japan lama kal ve turin min fuih a, ka kal ve ta a ni.” a ti.

Torres hi Atletico Madrid academy chhuak a ni a, kum 2001 leh 2007 inkar khan La Liga-ah Madrid club tan game 201 khelin goal 83 a khunga, Liverpool in an lei chhuak ta a nih kha.

Liverpool tan hian che tha leh nghalin, El Nino hian Liverpool tan game 142 khelin goal 81 lai a khung leh a, Chelsea chuan pound maktaduai 50-in an lei chhawng ve leh a, a hunlai khan Premier League player man to ber a ni a, tun thlengin Spanish player man to ber a la ni bawk.

Chelsea-ah hian a che tha ta lo hle a, AC Milan lamah te loan-a a khelh hnuin Atletico Madrid-ah loan bawkin a khel a, kum 2016 khan a lo chawrchhuahna club hian a nghetin an la ta a ni.