Marquinhos chuan Brazil team chu Tite-a'n a enkawl hnuah an thawhhona a that thu leh an in lungrual thu a sawi.

Tite hian Dunga thlakin Brazil national team hi a enkawl a, a hna a chelh hnuah tlawm hmel an la hmu lo a, Brazil player-te an khel tha hle nghe nghe.

Uruguay 4-1 zeta an sawp hnuah Brazil hian 2018 World Cup an hnaih zel a, dinhmun tha takah dingin team boruak pawh a tha hle.

Marquinhos chuan Tite chungchang sawiin, "Dinhmun sang taka kan din reng theih nan a thawkrim em em a, player-te ang maiin khelmual chhung leh training-na hmunah min vil uluk a, thahnem a ngai em em a ni.

"Kan inkhelh chhan mai bakah kan chak chhan hrechiang turin min duh a, kan inkhelh puite chunga zahna lantir a ngai pawimawh em em bawk. Chu chuan thawhrimna nasa tak a keng tel nghal a, player-te tan a pawimawh hle a ni.

"Tite-a hnuaiah hian khelmual chhunga kan nungchang pawh kan thlak hle in ka hria. Hunreilote chhungin team-ah hmasawnna leh a tha zawnga thil in thlak danglam hmuh tur a awm nasa tawh hle.

"Team pumpui kan kheltha a, kan in lungrual hle bawk. Kan thawhhona a tha a, hmatawng lam atanga defence lam thlengin kan inkhel a hmuhnawm hle in ka hria.

"Neymar, Firmino leh Coutinho-te hma lamah an kheltha em em a, khelmual laiah Paulinho, Renato Augusto leh Casemiro-te an rintlak em em bawk. Hma lam an puih ang chiahin defender-te min pui nasa a, goal an thun thei bawk.

"Paraguay kan hmachhawn leh dawn a, team tha tak an ni. Kan group awmna hi an that hlawm em avangin kan tang nasa a, kan inkhelh leh zel turah pawh nasa zawkin kan tang sauh sauh ang, "tiin Brazial National team website kaltlangin a sawi.