Chelsea chuan Inrinni zan khan Premier League inkhelah an London club pui West Ham an tlawh a, 3-2 in Chelsea hi an tlawm a, an manager Thomas Tuchel chuan West Ham lakah tihsual lian tak tak an nei tih a sawi.

Chelsea hi an game hnuhnung pathumah vawi hnih an chak zo tawh lova, kar hmasa khan Stamford Bridge-ah Manchester United inhnehtawkpuiin, pakhatna atangin tunah hian pathumnaah an tla thla.

Chelsea hian Hammers lakah hian Jorginho leh an goalkeeper Eduoard Mendy-te tihsual atangin penalty an chawi a, hun tawp dawnah Arthur Masuaku goal luh dan pawh goal mawi ni mahse Chelsea lam atang chuan goal an chhuah dan hi a ho angreng hle.

German manager Tuchel chuan, “Manchester United leh West Ham lakah hian a kan khel chhia in ka hre hran lova, kan khelh dan kha hnehna chan nan a tawk viau tho a ni.

“Goal awlsam tak tak kan chhuah a, chu chu kan tih thin dan a ni lo hle. Tihsual lian tak tak kan nei a, chu chuan lehlam tan chance tha a siam a, goal kan chhuah phah bawk. Heti ang hian United lakah pawh kan ti a, Watford lakah pawh kan ti a, West Ham lakah pawh kan ti leh.

“Tunah chuan a neuh neuh lamah hian kan tha tawk rih lova, tihsual lian neih loh chuan chakna chance a sang hle a ni. Counter attack lak atanga kan invenghim duh a nih chuan hetiang tihsual neih hi a thiang lova, a zawnin game thum chhung kan tisual tawh a, duh aiin a tam mah mah a ni,” tiin a sawi.