2014-15 European Football season khelh zawh a ni chho mek, Champions kan hre kim tawh.Bundesliga, La Liga, Premier League leh Ligue 1 te chuan season an khar tawh a, Serie A erawhin round khat khelh tur an la nei. League hrang hranga champion te tarlang ila.

La Liga

Champions - Barcelona

Runner up - Real Madrid

Kumin La Liga hi kum dang zawng aiin a hmuhnawm a. Nikum khan Atletico Madrid chuan title an rawn la ve hlawl, Real Madrid emaw Barcelona emaw in La Liga an inthunun chhawk a ni ber mai. Chutih laiin kumin chu a tawp dawn thlengin champion tur a sawi hleih theih lohva, match hnuhnung ber dawt an khelhin Barcelona an champion tih a chiang ta a ni.

Khelh 38 atangin Barcelona hian 94 points an nei a, pahnihna Real Madrid in 92 points an nei. Atletico Madrid chu pathumna niin, pakhatna atanga pathumna hian season tharah Champions League Group stage an khel anga, Valencia erawhin qualifying an khel dawn a ni. Sevilla leh Villareal te chuan Europa League an khel dawn bawk a, Division hniam lamah Eibar, Almeria leh Cordoba te an relegate ta a ni.

Top scorer chu Ronaldo niin goal 48 lai a khung a, amah hnaih ber tu Lionel Messi niin goal 43 a khung a, Griezmann leh Neymar ten goal 22 khungin Suarez chuan October thla atang chauhvin La Liga khel mahse goal 16 lai a khung thei a ni.

Assists nei hnem ber chu Messi niin, vawi 18 a nei a, Ronaldo chuan dawtin vawi 16 a nei. Barcelona forward tho Suarez chuan assists vawi 14 a nei hman bawk a ni. A team ang zawngin Barcelon-in ball possession an nei hnem ber a, 69.8% an nei a, Real Madrid-in dawtin 58% an nei a ni.

English Premier League

Champions - Chelsea

Runner up - Man City

Khelh 38 atangin Chelsea chuan 87 points an nei a, point 8 laiin pahnihna Man City lakah an fal. Chelsea tana player thawh hlawk ber chu Eden Hazard niin, goal 14 a khung bakah assists vawi 9 a nei a. Atletico Madrid atanga an striker lakluh Costa chuan a season khat naah goal 20 lai a khung tling. Barcelona atanga an lakluh Fabregas pawh a che tha hle a, assists vawi 18 lai neiin Premier League assists nei hnem ber a ni nghe nghe.

Premier League-ah hian Chelsea, Man City leh Arsenal te chuan Champions League Group stage an khel nghal dawn a, Man Utd erawh palina an nih avangin qualifying an khelh phawt a ngai dawn. Tottenham chu pangana niin Europa League an khel dawn a. Liverpool pawh parukna niin an khel thei dawn bawk a. Southampton hian an khel thei dawn nge dawn lo a la hriat chiah lova, FA Cup-ah Arsenal an champion chuan Southampton tan Europa League khelh theihna chance a inhawng dawn.

Hull, Burnley leh QPR te chu Championship division lamah an tlathla a. Premier League-ah hian Man City striker Sergio Aguero chuan goal 26 lai khungin top scorer a ni chiang hle. Tottenham striker Harry Kane chuan goal 21 khungin a dawt a, Diego Costa pawhin goal 20 a khung tling bawk a ni. Premier League-a Assists nei hnem ber chu Fabregas a ni a, vawi 18 neiin, Arsenal midfielder Cazorla chuan a dawt a, ani hian vawi 11 a nei a ni. A team ang zawngin Man Utd chuan possession an nei hnem ber a, 61.2% an nei a, Man City chuan dawtin 59.6% an nei bawk.

Bundesliga

Champions - Bayern Munich

Runner up - Wolfsburg

Germany-ah Bayern Munich chuan ro an rel chhunzawm zel a, khelh 34 atangin 79 points an hlawh chhuak a, pahnihna Wolfsburg chuan point 10 laiin an thlau a, an champion chiang hle. Bayern Munich champion theih nan hian season tawp lama inhliam Robben chuan tha a thawh hlawk hle a, goal 17 lai khungin assists vawi 7 a nei bawk.

Bundesliga-ah hian Bayern Munich, Wolfsburg leh Borussia M.Gladbach te chuan Champions League group stage atngin an khel dawn a, Bayer Leverkusen erawhin Champions League qualifying atangin an khel ang. Augsburg, Schalke leh Borussia Dortmund te chuan Europa League an khel anga. Paderborn leh Freiburg te an relegate a, Hamburger erawhin relegation playoff an khel dawn a ni.

Bundesliga-ah hian Frankfurt forward Meier chuan goal 19 khungin top scorer a ni a, Bayern player pahnih Robben leh Lewandowski te chuan goal 17 khung ve vein an dawt a ni. Wolfsburg player De Bruyne chuan assists a nei hnem ber a, vawi 20 lai neiin Bremen player Junuzovic chuan a dawn a, vawi 12 a nei a ni. A team ang zawngin Bayern chuan ball possession an nei hnem ber a, 70.3% an nei a, Dortmund chuan dawtin, 55.3% an nei a ni.

Serie A

Champions - Juventus

Runner up - Roma or Lazio

Juventus chuan a zawnin Serie A title vawi 4 an la ta a, khelh 37 atangin 86 points an hlawh chhuak. Serie A-ah hian Juventus champion chiang tawh mahse an la khel zo lova, thawhtan zan hian Roma leh Lazio te chuan pahnihna nih an inchuh dawn. Serie A ah hian pakhatna leh pahnihna te chuan Champions League Group stage atangin bul an tan dawn a, pathumna erawh qualifying an khelh a ngai dawn.

Hei vang hian Roma leh Lazio te hian pahnihna nih theihna chance an nei ve ve a, palina ni mek Napoli chuan Champions League an beisei ngam ta lo. Lazio hi chak lo ta pawh nise goal difference hmang chauhin Napoli hian Lazio an umphak thei tawh a, chuvang chuan Napoli tan beisei a bo ta a ni. Palina Napoli chuan Europa League an khel dawn chiang a, Fiorentina leh Genoa te karah hian tunge Europa League khel dawn a la sawi chian theih loh a ni.

A mawng lam erawh a chiang tawh a, Cagliari, Cesena leh Parma te an relegate a.Tun dinhmunah Serie A goal khung hnem ber chu Toni niin, goal 21 a nei mek a, Inter Icardi leh Tevez te chuan goal 20 ve ve khungin an dawt mek a ni. Serie A chungchang hi chu an khelh zawhah chiang kuangin kan la rawn tarlang leh zawk dawn nia.

Ligue 1

Champions - PSG

Runner up - Lyon

Khelh 38 atangin PSG chuan 83 points an nei a, pahnihna Lyon lakah point 8 laiin an fal. PSG tan Zlatan Ibrahimovic a thawh hlawk leh hle a, goal 19 khungin assists vawi 6 a nei am, Cavani chuan goal 18 khungin Lavezzi chuan goal 8 a khung a ni.

Ligue 1-ah hian PSG leg Lyon ten Champions League Group stage atangin an khel dawn a, Monaco erawh pathumna an nih avangin qualifying an paltlang phawt a ngai dawn a ni. Marseille chu palina niin Europa League an khel anga. Evian Thonon Gaillard, Metz leh Lens te erawh an relegate ta a ni.

Ligue 1-ah hian Lyon striker Lacazette chuan goal 27 khungin top scorer a ni a, Marseille forward Gignac chuan dawtin goal 21 a khung a, Zlatan chu pathumna niin goal 19 a khung a ni. Ligue 1-a assists hnei hnem ber chu Payet niin, vawi 17 lai a nei a, Pastore chuan dawtin, vawi 12 a nei a ni.