Federer hian kuminah game 20 khel tawhin tum khat chiah chak loh a nei a, Australian Open-a a champion hnu lawkah Indian Wells-ah champion lehin Miami Open-ah pawh Federer hneh thei an awm lo.

Roger Federer-a'n kumin chhunga trophy pathum a chawina ni turin Pathianni zan khan Miami Open Final-ah Rafael Nafael Nadal 6-3 6-4 in a hneh a, Australian Open final-ah intum tawk viau mahse Miami Open-ah erawh Nadal a tang thei meuh lo. Miami-ah Nadal a vanduai thin hle a, Final-a a chak loh tum ngana chiah a ni.

Set khatna 4-3 ah Federer-a'n Nadal service a break(chhusak) a, set hnihna 4-4 a nihin Federer hian Nadal service a break leh bawk. Set khatnaah break point vawi 10 lai awm mahse Federer-a'n tum khat a break tih loh hi chu player pahnih-in an hun tha neih an khawhral ve ve a ni.

Federer hi kuminah game 11 lai a chak zawn tawh a, nikum khan season chawhnu lamah thla 6 zet chawl mahse kumin a khel tha chho rem rem hle. Kum 35-a upa Federer hian kuminah game 20 khel tawhin tum khat chiah chak loh a nei a, Australian Open-a a champion hnu lawkah Indian Wells-ah champion lehin Miami Open-ah pawh Federer hneh thei an awm lo. Miami Open-a tum thum a champion-na niin champion thei upa ber record thar a siam nghal bawk.

A zawna Nadal tum li a hneh hnuah(Nadal laka a chak zawn rei ber tum) Federer chuan, "Ka duhthusam a thleng mek zel e. Kum bul tan dan tha tak a ni a, nikum khan hun harsa ka paltlang avangin ka team mai bakah min tawiawmtute zawng zawng chungah lawmthu ka sawi duh a ni," tiin hun rei tak a chawlh hnua tha taka a rawn kir leh thei chu a lawm thu a sawi.

Miami Open-a champion ngei tum mahse Nadal a vanduai zawkah a tang leh a, Spanish world no 1 hlui chuan, "He hmuna ka khelh apiang hian trophy te zawk ka hawn ziah a, a lungawi thlak loh thin khawp mai. Chak lo zawkah tang mah ila ka tan kar tha tak niin ka hria, kumina Roger-a tum thum ka hneh lohna nimahse Final pathum ka thlen theih avangin bul tanna tha tak a ni," tiin chak zo lo mahse a khel tha thawkhata a hriat thu a sawi. Nadal hi Australian Open final-a chak loh hnu lawkah Mexico Open final-ah a chak lo chhunzawm nghal a, player hriat hlawh tak ni lem lo Sam Querrey a hneh lo a ni. Miami Open-ah tum dang ang bawkin Final-ah a tlawm leh a, inhliam vanga hun rei tak a chawlh vang vang hnuah a khel tha chho hle.