Season thar lo awm turah hian West Brom, Swansea, Watford leh Bournemouth-te hi Premier League-a an champion i ring em? I ring hauh lovang. Khatiang chiah kha a nia, season hmasa khan a mawngphah atangin an zuangchhuak a, an him ta hram a nih kha.
Tuman Leicester City hi an champion an ring ngai lo. Mahse vawiinah chuan Premier League champions an ni ta mai si a. Sports-a hetiang chanchin ropui mak danglam hi ka piana hnu lamah ka hriat vawi khatna a ni. Tlawng lui hi a let zawngin luang ta se, a mak tur zia chu! Tuna Leicester City champion pawh hi chutiang vela mak chu a ni kan ti thei awm e.
Division hniama an tla tur chhanchhuaktu Nigel Pearson an ban hnua Ranieri an lakluh khan fans tam tak an lungawi lo a nih kha. Mahse thluak fing Ranieri chuan thil theih loh nia kan ngaih chu a rawn thei ta si a. Sum sen tam zawng ngaihtuah phei chuan tuna Manchester City leh Man Utd squad hlut zawng hi 400 million poung chunglam a ni a. Leicester City squad hlut zawng erawh 60 million pound pawh a tling lo.
Kum 2010 hnu lama Premier League-a champion tawh Chelsea, Man City leh Man Utd te chu an champion kuma an squad hlut zawng chu 200 million pound chunglam vek a ni. 2015-16 season-a Leicester City champion squad hlut zawk chu 57 million pound chiah a ni thung.
Sum hman tam leh tam loh hi a lo ni ber lo tih heta tang hian a lang chiang a, hei hi a ni Football khawvela chanchin ngaihnawm tak mai chu. Leicester City chanchin atang hian zir tur tan tak khawvelin a nei chiang mai.
Tournament leh Champions League ang chiah hi chuan vanneih a awm theih a, match a tam loh avangin team tha vak lo pawhin an match tinah theih tawp an chhuah chuan tournament reilote chhung na na na chu a tawp thlengin an tang thei. Chutih laiin squad nei chhah ve lo tan League liana season tluana tan mar pat chu thil theih ni hian ka hre ngai lo. English Premier League ang chiah hi chuan squad nei tha ber leh sum seng hnem ho che tha turah ka lo ngai thin a. Kum tluana tha thlah hauh lova Foxes an han kal tluang thei hi chu a mak tih ngawt lo chu sawi tur pawh ka nei lo.
Tuna an first XI rinrawlte hi Arsenal, Man Utd, Chelsea leh Man City te chhawr duh loh tur chi an ni hlawm a, Vardy leh Mahrez te erawh an lut ve nual thovang, chutih laiin player dangte hi chu regular tur hi an awm lo reng reng. Chuta tang chuan player tha awmkhawm an nih loh zia a hriat theih awm e. Mahse khawvela Football league hautak berah an champion tlat bawk si.
Season tir khan Ranieri chuan an tum ber chu relegate loh a nih thu a sawi thin a nih kha. Season chawhnu tir lamah pawh an tum ber chu Premier League-a cham chhunzawm zel a nih kha. Match khat atan chiah an inbuatsaih a, an zawng zawngin an khel bawk a, pen khat te tein an pen a, chu chu an chakna hnar chu a ni ta a ni.
Tun season hian che tha tura rin team an che tha lo nual a, club lian chet chhiat vangin an che tha ti dawn ila 77 points lai an hlawhchhuah avang hian mi chet chhiat laia rawn lawr chhuak ngawt chu an ni bik lo. Khelh 2 a la awm a, kum dang zawng aiin league a hautak tih khawvelin an hria, point 80 hlawhchhuak thei dinhmunah an ding, season dang nen khaikhinin champion team te point hlawhchhuah ang an hlawhchhuak ve dawn tho niin a lang.
Leicester City player-te hi hlawhah an buai ve lova, Football khelh chu an nuam tih ber a ni a, hlawh tha zawk ngaihtuaha club dang chanchin sawi pawh an awm lo, hlim takin football an khel a, engemaw tak hlawhchhuah an tum a, an mumangah pawh an man phak loh hlawhtlinna an chang ta a ni.
Leicester City hian Football khawvel a nghawrnghing a. Zirtur tam tak an hnutchhiah bawk. Sum hi team chakna niin khawvel chuan an ngai thin. Mahse team man tlawm tak ni chungin hlawhtlinna a chan theih tih Foxes hian an lan tir chiang hle. Leicester City regular first XI ho man belhkhawm chu £22m chauh a nih laiin Manchester City regular first XI man belhkhawm chu £281m lai a ni hem mai. Leicester City first XI man belhkhawm aiin Man City midfielder Kevin de Bruyne man £55m pawh pawh a la tam fe zawk a ni.
Kum 1992-93 khan Premier League tan a ni a, Man Utd, Arsenal, Chelsea, Man City leh Blackburn Rovers zingah Leicester City chuan a hming an ziak lut ve ta a ni. Kum 1928-29 season kha top flight-a an thlen san ber niin, pahnihna an ni. Kum 2002 khan Sum lamah harsatna an neih avangin Financial Institution kutah an tlu lut. Kum 2009 khan League One title an la a, 2014 khan Championship winner niin, kuminah Premier League champion an ni ta a ni.