December ni 7, Nilaini zanah Taekwondo Fight League (TFL) final chu Electric Veng YMA hall-ah khelh a ni dawn a, hemi rual hian mipa leh hmeichhia Champion of Champions 2016 Title inchuhna hmuhnawm tak a awm bawk ang.
Mipa title kawl mektu chu Johny Vanlalruatsanga, Zarkawt/RSC a ni a, Under 74kg a champion lai niin tun kum 5 chhunga Mizo Taekwondo player zinga achievement nei tha ber kan ti thei ang. International medalist niin Mizoram tan Gold medal 5-a la tawh a, feet 6-a sang tharum nei tak leh zuang zang tak a ni.
Challenger chu Lalramdinthar a, Thenzawl a ni a, pa laihawl tuanrang, Under 63kg champion lai a ni. Johny-a cho thei tur khawp thiam thil leh theihna ngah, tawnhriat pawh nei tha niin kum 2013, 2014 khan he title hi a lo la tawh a. Johny-a tum tur hian weight hrang hrang champion mi 3 a paltlang a, tunah hian a vawi 3 nan a Champion dawn nge Johny hian a vawi 4 nan title a la dawn tih sawi lawk a har khawp mai.
Hmeichhe lamah hian Champion lai chu F. Lalrempuii, Khawzawl a ni a, amah chotu chu Kaplianzawni, Ramthar a ni.
Rempuii hi India tan pawha medal la tawh, a awmna weight Under 67kg-a Champion lai a ni nghe nghe a. Feet 5.7-a sang a niin a a zawna India rama Gold medal vawi 4 la thei a ni. A chotu Kaplianzawni pawh hi a duai hauh lova, Nute Under 49 kg Champion niin feet 5.3 a sang, a tumpui tawh chu a lian a te thiat hmiah hmiah thei zel mai a ni. Senior level National Games-ah pawh medal la thei a ni a. Nu sang leh nu te, tharum leh speed game inelna kan hmu ang.
Champion of Champions Title hi kum 1992 atang khan MATA hian a zawng tan a. Junior leh Senior Weight Category hrang hranga Champion te chu an in tum leh vek a, chuta chak ber chuan he title hi an dawng thin a ni.
TFL Final zanah hian Mizoram Chief Minister Pu Lal Thanhawla khuallian a ni ang a, tunlai mi zaithiam lar tak Lil’Zova pawh a rawn che dawn bawk a. Tin, TFL Dance Competitition-a Champion leh Runners up te an lam bawk ang.
MIPA Champion of Champions lo ni tawhte:-
1.Robert Zohmangaiha1992
2.Joseph Thansanga1994
3.Moses Lalsangzuala1995, 2000
4.Lalduhawmsanga1997
5.Peter Vanlalhluna1999
6.Anthony Siamkima2000 March
7.K. Lalramdinthara2000 December
8.C. Malsawmtluanga2002, 2003, 2004, 2005, 2006
9.James Lalthangmawia2007
10.V. Lalawmpuia2008
11.V. Lalrinhlua2009
12.C.Vanlalhuma2010
13.Johny Vanlalruatsanga2011,2012, 2015
14.Lalramdinthara2013, 2014
Hmeichhia Champion of Champions lo ni tawh te;
1.Lalremruati2010, 2011
2.F. Lalrempuii2012, 2015
3.F. Lalmuansangi2013, 2014