35th National Senior Kyorugi & Poomsae Taekwondo Championship chu February ni 19, Pathianni khan Visakhapatnam-ah khelh zawh a ni a, Mizoram team chuan Gold 1, silver 2 leh bronze 4 an dawng.
He championship-a medal latute hi 2018 Asian Games inbuatsaihna National coaching Camp-ah koh nghal an ni.
Mizoramin gold medal a lakna hi Poomsae mixed pair-ah a ni a, R.Lalchhandama (Mission Vengthlang) leh Lalhlimpuii (chawnpui) tangdun an ni. Over 30years category inelna a ni a, preliminary round, state 32 inelna atanga pair 16 thlanchhuah zingah pakhatna an ni a. Pair 16 te inelnaah pahnihna ni zui lehin Sikkim an phak lo. Final round-a pair 8 tha thlanchhuahten poomsae 2 zelah inelna neiin Chhandama leh Hlimi te hian point an hmu sang ber a, gold medal an hlawhchhuak ta a ni.
(adsbygoogle = window.adsbygoogle || []).push({});
Taekwondo Poomsae inelna dang under 30 years-ah Catherine Lalhruaitluangi(Republic Vengthlang) leh Daniel Lalhumthanga(Chhinga veng) te chuan silver an dawng ve bawk a. Prelimnary round ah pathumna niin semi final round(team 16 inelna)ah pakhatna an ni a. Final round-ah hian point 0.01 a Delhi tluk lovin gold medal an dawng pha ta lo a ni.
Team Leader Joseph Thansanga chuan 2018 Asian Games-ah Poomsae telh a nih dawn avangin kum dang zawng aiin state dangte inbuatsaihna pawh a tha a, South Korea-ah te advance training neiin hma an rawn sawn hle hlawm a ni a ti.
F.Lalrempui chuan Kyorugi inelnaah Silver medal a dawng a, champion lai hian 67kg huangah Kerala 7-3 a hnehin bul a tan a. Quarterfinal-ah Tamil Nadu 8-5 in a hneh leh a, Semifinal-ah Manipur player knock-out in final a lut chiang hle. Mahse semfinal-ah hian a inhliam hlauh mai a, inhliam chunga final khelin a khingpui Maharsahtra player chu 7-9 in a hneh zo ta lo a ni.
Remi hian semi-final-ah a ke ti na a, doctor-ten khel lo turin an ti naa a khel lui a, a hneh tak loh hi Maharastra nula Junior Champion lai a ni. Remi hi kum 4 zet India champion a ni dawn tawh a, kuminah a title a hloh ta a ni.
Kyorugi ah hian Lalramdinthara (Thenzawl) chnuan bronze dawngin SSCB atanga MATA transfer player Vikasan chuan silver a la a, Jitender Kumar an bronze a la bawk.
Coach Joseph Lalsiama chuan kan inbuatsaihna a tha a. electronic system hmang turin ngawrh takin kan training a, technical harsatna avanga kan hman leh tak loh thut avangin chawpchilh taka in siam rem thei lo player junior deuhin an tuar a ti.
Mizoram team hi Joseph Thansanga Head of team, F.Laltanpuia Manager, R.Lalchhandama & Joseph Lalsiama Coach ten an hruai a. Nilaini hian Aizawl.an lo thlen beisei a ni.
Medal latute:-
Gold medal
1. R.Lalchhandama & Lalhlimpuii - Poomsae Mixed Pair over 30 yrs.
Silver medal
1. Vikas - under 87 kg
2. Catherine Lalhruaitluangi & Daniel Lalhumthanga - Poomsae Mixed Pair under 30yrs.
Bronze medal
1. Lalramdinthara - under 58 kg
2. Jitender Kumar - under 67 kg
3. Lalhlimpuii - poomsae individual under 30yrs
4. Catherine, Lalhmangaihthangi, Lianthangpuii - Poomsae Team under 30 yrs.
(adsbygoogle = window.adsbygoogle || []).push({});