Team 30 chuang telna, Lungleia Sub Hqrs YMA Football tournament, Thuamluaia muala khelh mekah Round of 16 nimin atang khan khelh tan a ni ta.

Nimina inkhelah Zobawk Venglai Branch chuan 6 - 3 in Venglai Branch an hneh a, Ramthar branch in 3-1 in Bualte an hneh bawk.

Vawiin khan Sub Hqrs Inter Branch FB tournament a Champion hmasaber Sethlun Branch leh Zotlang Branch te an inkhel a. He hunah hian Pu Zonunzira (Kumar-a), Dt. 7th Nov. 2016 a accident vanga boral ta puala hun hman a ni.

Pu Zonunzira hi Sethlun/MAP footballer lar tak thin niin vawi tam tak Lunglei aiawhin a lo khel tawh thin a. Tun kum 10 vel liamta kha chuan Lunglei Football-ah amah hre lo an awm lo. Inter Branch YMA Football bikah hian Sethlun team-te hi vawi thum Champion tawhin, vawi hnih chu Pu Zonunzira hian a ho nghe nghe a ni. Hetianga Lunglei Football-a hming dai tawh ngai lo turin hun lo taka a boralsan hi, amah sun nan vawiin inkhel tan hma hian ngawi rengin minit khat din niin, chu mai bakah Sethlun team-te hian ribbon dum amah sun nan hian an hreng bawk a ni.

Vawiin inkhelah hian Pu Zonunzira fapa Petera pawh Sethlun team ah hian a tel nghe nghe a ni.

Vawiin inkhel ah Sethlun branch leh Zotlang branch te hi hun pangngaia 2-2 a an inhnehtawk avangin tie braker hmanga chak zawk zawn a ni a, Sethlun hian 4-2 in hnehna an chang ta a ni. Inkhel dangah Electric veng Branch in 4 - 2 in Ramlaitui Branch an hneh bawk.

Naktuk (15.11.16) a inkhel tur te chu:

Dar 10:00am-

Chanmari Branch vs Venghlun Branch

Dar 1:00pm-

Lunglawn Branch vs Luangmual Branch