Manchester City defender John Stones chuan kaihza tha hliam vangin kar ruk chhung chawlh a mamawh dawn.

Kum 23 mi hi Inrinni zana Leicester an hneh țumin a inhliam a, minute 31-naah lakchhuah niin French defender Eliaquim Mangala chuan a thlak.

City manager Pep Guardiola chuan Stones hliam hi pawi ti viau mahse a chawlh hun chhung tur hi a chiang tih a sawi a, central defender ngah lo mahse kawngdang an hmuh tur thu a sawi bawk.

City hian khup hliam vangin French left-back Benjamin Mendy pawh an chan mek a, Monaco left-back hlui hian September thla khan Crystal Palace an hmachhawn țumin hliam hi a nei a thla nga chhung a chawl dawn.

Inrinni zana Stones thlaktu Mangala hian tun season-ah game li chiah ala khel a, chawn hliam vanga chawl deuh reng Vincent Kompany pawh a dam tawh a Belgian defender hian tun season-ah game li chiah ala khel ve tho bawk a ni.