Manchester City player Rahem Sterling chu tun nipui bazar-ah chhuak mai tur angin media-te chuan an sawi nasa hle a, Manchester City hian an chhuah phal hial ni te pawhin an sawi.

City manager Pep Guardiola chuan Sterling chu chhuak lo tura an duhthu leh contract thar ziak tura a duhthu a sawi ve thung.

Guardiola chuan, “Sterling hi a contract chungchangah inbiakna ka la neih pui lo. Sports director emaw manager ka ni lova, trainer ka ni. Team tan boruak tha tak siama match tin chak hi ka thil tum ber a ni,” a ti.

“Sterling hi cham zel se kan duh em em a, theihtawp kan chhuahpui zel dawn. Inremna chu a la awm loa, mahse Sterling leh a agent hian cham tura kan duh zia chu an hria,” a ti bawk.

Sterling hi contract zawrh a ni a, thla eng emaw zat chu a la rial rih a, chhuak mai tur angin media-te chuan an sawi nasa hle. City hian an player manto ber ni turin Riyad Mahrez an lalut thara, Bernardo Silva leh Sane-te an awm sa bawk nen, Sterling hi a chhuah mai a rinawm hman a, tunah erawh a chhuah a rinawm ta lo zawk a ni.

Season liamta khan Sterling hi City tan a khel tha hle a, tun season-a City Premier league game hmasa berah pawh chawlh hmang rei mahse Sane aia khelhtir a ni a, a khel chhe lo.

Hemi anih avang hian season thar lo awm turah pawh Guardiola hian Sterling hi a hman rim leh hle hmel a ni.