15 Dec 2016 01:33

PC Lala

inkhel correspondent and photographer

State Level Khelo India Competition tan a ni

India rama infiammite sports hmasawnna tura ruahman Khelo India kalpui mekah State Level Khelo India Competition 2016-17 chu Aizawlah December ni 15, Ningani chawhma dar 10:00 khan Rajiv Gandhi Stadium-ah Pu P.S.Sanghluna, Addl.Secretary, Sports & Youth Services chuan a hawng.

A hawnna inkhawm hi Pu C.Lalremsanga, Chief Coach, Sports & Youth Services department chuan kaihruaiin Mizoram State Sports Council official engemawzatin an hmanpui bawk a ni.

Khual lian Pu P.S.Sanghluna chuan, " Mihringte hian talent kan nei theuh a, kan talent dawnte hmangchhuak thiam tura huaisenna kan neih a ngai. Sports-ah Mizoten hma kan sawn em em a, India rama a sang ber pawlah kan invawrh mek tawh a ni. Sang zawk thleng turin kan inbuatsaih a ngai a, chutiang tur chuan kan taksa pawh ruitheihthil lakah a fihlim a ngai. Theihtawpa kan tan phawt chuan hlawhtlinna kan hmu ngei ngei ang" a ti.

State Level Khelo India Competition 2016-17 ah hian mipa leh hmeichhia intihsiakna chi hrang 10 ve ve a awm a, Rajiv Gandhi stadium-ah football leh Athletics inelna neih a ni a, R.Dengthuama Indoor Stadium, Mualpuiah Judo, Wrestling leh Taekwondo inelna neih a ni a, Ramhlun Indoor Stadium-ah Badminton leh Table Tennis, Ramhlun Sports Complex-ah Hockey, Weightlifting leh Boxing inelna neih a ni bawk.

Khelo India Competition hi Mizorama district tinah neih a ni tawh a, ditrict tina champion theuhten Aizawlah inelna nei lehin heta champion te hian Mizoram aiawhin India ram pum huap inelna an hmachhawn leh dawn a ni. Zirtawpni (16 Dec) tlaiah State Level Competition hi zawhfel a ni ang.