Hrem a tawh hnua intihsiakna a khelh leh hmasak ber (US Open)-ah Maria Sharapova chuan third round thleng mahse fourth round erawh a paltlang zo ta lo va, Anastasija Sevastova lakah a tlawm ve ta.

Kum 30 mi Sharapova hian 5-7, 6-4, 6-2 in Latvian star hi a hneh lo a, kum 27 mi Sevastova hian quarter-final-ah Julia Goerges hnehtu Sloane Stephens a hmachhawn ang

Hmeichhe lama inkhel dangah Petra Kvitova chuan Wimbledon-a champion lai Garbine Muguruza an hneh a, Czech star hian 7-6, 6-3 in Muguruza hi a hneh a quarter-final a lut.

Kum 27 mi Kvitova hian nikum December thla khan a ina a awmlaiin misual kutah a nunna a chan teuh hle a, misual hian a inah luhchilhin chemte nen a vaua nunna erawh a chan lo hlauh.

Hetia beih a tawh hunlai hian a kut hliam vangin zai a tawk a, kumin May thla ațang khan a inkhel leh thei chauh.

Inkhel dangah Venus Williams pawhin hnehna changin quarter-final a lut a, kum 37 mi hian 6-3, 3-6, 6-1 in Carla Suarez Navarro a hneh.

Mipa lama langsar Roger Federer leh Rafael Nadal-te pawhin quarter-final lut turin fourth round paltlang an la hmabak a, Nadal hian Thawhțanni hian Alexandr Dolgopolov a hmachhawn dawn a Federer hian Thawhlehniah Philipp Kohlschreiber a hmachhawn thung dawn a ni.