Liverpool chuan Champions League group match-a an game hnuhnung ber dawttuah Sevilla luhkhungin hnehna an chang zo lo va, goal thum khung hmasa zet mahse Sevilla-in an sut zo leh vek a point khat an hlawhchuak.
The Reds tan hian Roberto Firmino chuan goal hnih khungin Sadio Mane chuan goal khat a khung ve bawk a, Sevilla tan hian Ben Yedder chuan goal hnih khung vein Guido Pizarro-a'n goal khat a thawh ve bawk a ni.
Liverpool hian kartawp liamtaa Southampton hnehtu team ațangin player siksawi an nei a, Simon Mignolet aiah Loris Karius-a'n goal a veng a Trent Alexander-Arnold pawhin inkhel bulțan lovin right-back-ah Joe Gomez a awm.
Sevilla 3-3 Liverpool
(Ben Yedder 51', 60' pen, Pizarro 90'+3) (Firmino 2', 30', Mane 22')
Sevilla XI: Rico (GK); Mercado, Geis, Lenglet, Escudero; N'Zonzi, Banega, Pizarro; Sarabia, Ben Yedder, Nolito.
Subs: Corchia, Krohn-Dehli, Correa, Soria, Navas, Muriel, Vazquez.
Liverpool XI: Karius (GK); Gomez, Lovren, Klavan, Moreno; Wijnaldum, Henderson, Coutinho; Salah; Firmino, Mane.
Subs: Milner, Sturridge, Oxlade-Chamberlain, Mignolet, Can, Solanke, Alexander-Arnold.
Hamrik a ri fel chiah tihah Liverpool-in an nawr nghal a Sadio Mane chuan corner hlawhchhuakin an goal khatna an khung nghal. Philippe Coutinho corner pet ațangin Roberto Firmino chuan an goal hmasa ber hi a khung a, Brazilian midfielder corner pet hi Wijnaldum chuan tauh pial zeuhin a hnunga awm Firmino tan hlah rual loh a awlsam a ni.
Mikhual team zawkin ball an chang tam zui a Sevilla pawhin goal khung tum ranin an bei ve nghal.
Ben Yedder chuan Henderson laka ațanga ball a lak hnuin Nolito a pe a, Spanish forward hian goal-ah petin Liverpool goalkeeper Karius-a'n a khawih per hman a goal ban erawh a per tho va The Reds an him hram.
Hemi hnu lawk hian Ben Yedder bawk a hlauhawm leh a, goal khung lo mahse Liverpool fan-te lungphu a ti rang hman a a duh angin a tawp erawh a khar lo.
Mualneitu lamin nawr ve tho mahse Liverpoll bawkin an hlauhawm zia an pholang veleh thuai a, goal an neihbelh bawk.
Mikhual team goal hnihna hi Sadio Mane tauhluh a ni a, Coutinho corner pet ațang bawkin a lut. Coutinho hian ball thlawh pheiin Firmino-a'n alo tauh pial zauh a, an hnung lama awm
Mane hian mawi takin a tauh goal a si hnihin hma an hruai.
Darkar chanve an khel tling tihah Liverpool zawk bawkin goal an khung leh a, Mane chuan ball tlanluhpuiin Sevilla tlarhnung a tlanpel a goal-ah petin Sevilla goalkeeper Rico chuan dang mahse ball per hi Firmino chuan changin an goal thumna awlsam takin a khung.
Brazilian forward Firmino hian a pet goal dawn a ball a chan tawh hnuin a en miah lo a, 'confi' takin he inkhela a goal hnihna hi a khung.
Sevilla-in si thum phur tawh mahse goal khung an tum ve zel a, an vanneih ni chu nise an hun țha neih hmasa pahnih khung thei tur an ni.
Liverpool tlarhma pawh an khel țha hle a, Sevilla tlarhnung tan ven uluk an ngai a tihsual zeuh a goal chhuah thei an ni tih a chiang viau tawh bawk.
First half-ah goal dang a luhbelh lo va Liverpool-in inkhel an thunun mah zawk.
Second half-ah first half lama goal khung thei lo Sevilla an in siamțha a, minute 51-naah Ben Yedder chuan Ever Banega ball vawrluh tauh goal-in an si phur a sut țhen.
Muanleitu lam an phur a ball chang tam nghal zawk bawkin an si phur sut zawh ngei an tum.
Minute 60-naah Liverpool defender Alberto Moreno chuan Sevilla forward Ben Yedder ti tluin penalty a chawi zui a, Ben Yedder hian ama penalty hlawhchhuah hi goal-ah chantir zuiin si khat chiah an phur tawh.
Ramon Sanchez Pizjuan Stadiumn-ah Sevilla fans au thawm a țha hle a, goal khung tumin team pahnih an in nawr tawn bawk a inkhel boruak a nung țha ngei mai.
Ball an in chan chhawk deuh zak zak karah team pahnihin hun țha an insiam zeuh zeuh a, goal lut mai lo mahse inkhel hmuhnawm a tling.
Huntawp hma hretah mualneitu lamin an si phur an sut zo ta nge nge a, Argentine midfielder Guido Pizarro chuan corner ațanga ball kal khungin an khelmualah lawmin an fan-te nen an sapatal.
Hun a tawp zui a goal thum khung hmasa Liverpool-in an goal neih an humhim zo lo va Spain-ah point khat an hlawhchhuak.
Liverpool hian Group E-ah hma an hruai chhunzawm zel a, December ni 6-a Spartak Moscow an mikhual hunah an tlawm loh chuan knockout stage an lut ang.