Serie A: Inter leh AC Milan an chak; Napoli an tlawm thung

05th December 2021, 12:12PM

Inrinn zan Serie A inkhelah table lera awm pathum Inter Milan, AC Milan leh Napoli te an inlan vek a, Milan club pahnih te hian an khingpui ve ve an hneh laiin, Napoli erawh an tlawm.

AC Milan hian khelh 16-ah point 38 hlawhchhuak tawhin, league hmahruaitu an ni chhunzawm zel a, Inter hian khelh 16-ah point 37 neiin, pahnihna dinhmun an luah ve thung. Napoli hian khelh 16-ah point 36 an nei a, pathumnaah an awm ve mek bawk a ni.

San Siro-ah AC Milan hian Salernitana an lo mikhual a, mual neitu lam Milan hian si hnih faiin hnehna an chang a, point thum hlu tak an hlawhchhuak.

AC Milan tan hian Franck Kessie leh Alexis Saelemaekers te chuan goal khat ve ve Salernitana lakah hian an khung a ni.

Inkhel an tan chauh tihin Kessi chuan Milan hmahruaina goal a khung a, minute sawmhnih an khelh tlin hma deuhin Saelemaekers chuan Milan goal hnihna hi a khung ve leh.

Champion lai Inter Milan chuan Jose Mourinho-a team AS Roma chu Stadio Olimpico-ah an luhkhung a, si thum faiin mikhual lam Inter hi an chak a, point thum an hawn.

Minute sawm chuang an khelhin Turkish playmaker Hakan Calhanoglu chuan Inter hi hma a hruaipui a, minute sawm hnu velah Bosnian striker Edin Dzeko chuan Inter goal hnihna a thun. Half time hnaih tawh lamah Dutch full-back Denzel Dumfries chuan Inter goal thumna a khung ve leh a ni.

Napoli chuan Diego Armando Maradona Stadium-ah Atalanta an lo mikhual a, mikhual lam Atalanta hian 3-2 in hnehna an chang a, point thum an hlawhchhuak.

Mual neitu lam Napoli tan Piotr Zielinski leh Dries Merterns chuan goal an khung a, Atalanta tan hian Ruslan Malinovskyi, Merih Demiral leh Remo Freuler te chuan goal an khung ve thung.

Malinovskyi chuan minute sarihna lekah Atalanta hi hma a hruaipui a, mahse half-time hma deuhin Zielinski chuan Napoli si phurh a rul. Second half tir teah Mertens chuan Napoli hi hma a hruaipui a, 66mins-ah Demiral chuan Atalanta si phurh sut ve lehin, a hnu deuh lawkah Freuler chuan Atalanta chakna goal a khung a ni.

Atalanta hi palinaah an awm mek a, khelh 16 atangin point 34 an hlawhchhuak tawha, pathumnaa awm Napoli nen hian point hnihin an inthlau a ni.

Copyright © inkhel.com 2022. All rights reserved.