Mizo football chanchina hming daih tawh ngai lo tur Syhlo Malsawmtluanga (Mama) hian Mizote thinlungah chuan hmun a luah reng tawh dawn a, Mizote football zinkawnga sulsutu pawimawh tak niin mi entawntlak tak a ni bawk.
Mama hian kum 1984 October ni 24 khan S Zathanga leh Kapveli-te fa tlum ber ni turin khawvel eng alo hmu țan a, an unau hi panga (mipa pahnih leh hmeichhia pathum) niin South Vanlaiphai khua an ni.
Kum 10 mi anihin Aizawl-ah lehkha zir turin a ute bulah a awm a football ngaina tak mi a ni bawk.
MAMA FOOTBALL ZINKAWNG
Kum 1998-ah khan Subroto Mukherjee khelin Mizoram aiawh zingah a tel a, Delhi-ah Subroto hi khelh niin Mizoram hi pahnihna an ni a Mama hi Tata Football Academy (TFA) chuan an hnena trial turin an ko nghal a, trial hi a nei nghal.
TFA-a trial hlawhtling tak a neih hnuin Mizoram lamah alo haw leh phawt a kum 1999 khan TFA hi zawmin a in zir chho. TFA a zawm kum hian Singapore-ah Lion Cup khelin India a champion pui a, goal nga (5) khungin India hi a champion pui a hei hi India tan a khelhna hmasa ber a ni.
Kum 1999-ah tho hian Bihar state tan National Sub-Junior Championship (Under-16) khelin a champion pui leh a, kum 2000 khan Guwahati-in an thlen Bordoloi Trophy-ah an champion leh bawk.
Kum 2000-ah bawk hian Durand Cup-ah telin Most Promising Player-ah thlan a ni nghe nghe a, kum 2001 khan Under-19 National Football Championship-ah pakhatna niin an champion leh bawk.
Kum 2002 khan AFC Under-20 qualifying round khelin vawihnih lai Man Of The Match-ah thlan a ni a, AFC Under-19 khel tur hian an tling zui a he intihsiakna hi Qatar-in an thleng.
Kum 2004-ah khan SAFF Cup khelin India tan a khel leh bawk a ram tan sulhnu a nei chhe lo.
Kum 2014 khan Mizo zinga ziakmi langsar Darrokima puihna in a chanchin ziahna 'KHELMUAL NUNCHAN' tihchhuah a ni a, lehkhabu chhiar hmanhla leh hlu a tling.
CLUB LAMA MAMA SULHNU
Mi nun ngil leh mi tumruh ni bawk Mama hian kum 2002 khan India rama club hlun leh sulhnu nei țha East Bengal a zawm a, Kolkata club-ah hian kum sarih awmin kum 2007 khan Salgaocar lamah a insuan a Goan club-ah hian season khat a khel.
Goa lama season khat a hman hnuin Kolkata lamah a kir a, Mohun Bagan-ah lutin Mariners-ah hian kum khat chhung a awm a kum 2009 khan Kolkata club tho United Sports Club/Prayag United chuan an lalut.
United Sports Club-ah hian kum 2013 thleng khelin a club East Bengal-ah a kir leh a kum 2014 khan Indian Super League (ISL) khelin Delhi Dynamos tan a inlan.
Kum 2015 khan Delhi Dynamos hi semi-final a thlenpui a FA Goa hnehlohin final an lut zo ta lo.
Mama hian kum thum chhung East Bengal-a hun a hman leh hnuin Kolkata club tho Southern Samity a zawm leh a, 2016-17 season-ah khan I-League Second Division khelin pahnihna an ni.
Southern Samity hi chhuahsanin Mizoram-ah a lokir a kumin (2017) July thla khan Aizawl FC chuan an lalut a, I-League 2016-17 season-a champion team-ah hian tun thlengin ala khel.
Sawi hmaih thiang lo chu kum 2015 khan Kolkata League-ah East Bengal a champion pui a, hei hi a zawna vawiruk an champion-na niin record chhinchhiah tlak tak an siam.
CLUB TANA MAMA HLAWHTLIN TAWHNA
East Bengal:
Kolkata League - 2002, 2003, 2004, 2006, 2014, 2015
Indian Super Cup - 2006
Kolkata Super League
Airlines Gold Cup
ASEAN Club Championship (international tournament) - 2003
Mohun Bagan:
Kolkata League - 2008
Federation Cup - 2008
Indian Super Cup - 2008
United Sports Club:
Durand Cup - 2009
IFA Shield - 2011