Junior Indian Men’s leh Women’s Hockey team te chuan India ram chhuahsanin, April 25 atanga tan tur Youth Olympic Games Qualifiers a tel turin Bangkok, Thailand an pan a. Mizo nula Lalremsiami chu hmeichhe team-ah Vice Captain a ni.
Ni 5 chhung awh tur tournament hi Buenos Aires, Argentina a Youth Olympic Games 2018 neih huna tel thei tur zawnna a ni a, hetah hian hockey kalphung thar, Hockey 5 format an tih chu an hmang ang.
Mipa team-ah hian Vivek Sagar Prasad chu captain a ni a, Vivek hi Gold Coast XXI Commonwealth Games-a Indian Men’s Team ah pawh khan a tel a, Rabichandra Singh Moirangthem chu Vice Captain a ni.
India mipa team hi Korea, Japan, Hong Kong, China leh Thailand te nen Pool A ah an awm a, April 25 hian a thlengtu Thailand leh India hi an inhmachhawn nghal dawn a ni.
Mi 9 awmna Junior Men’s team coach Jude Felix chuan, “Agra-ah tha takin kan inpuahchah bawk a, kan phur tlang khawp mai a. Tih tak takna nen, rim takin kan inbuatsaih a, thla khat leh a chanve vel chu ngawrh takin training kan nei a, hei vang hian result tha tak kan neih ka beisei khawp mai,” a ti.
Salima Tete chu Junior Indian Women’s Team Captain a ni a, Mizo nula Lalremsiami chu Vice Captain a ni bawk a. Anni pahnih hi XXI Commonwealth Games-ah khan India aiawhin an tel a, semi final an thleng nghe nghe a ni.
Hmeichhe team coach Baljeet Singh Saini chuan, “Ram tana khel tawh te an awm a, ngaih a that phah khawp mai a. Inpuahchahna kan nei tha a, hei vang hian kan che tha ngei dawn tih hi ka ring tlat a ni,” a ti.
Hmeichhe team hi Korea, Thailand leh Singapore te nen an awmho a, April 25 hian Singapore nen an inhmachhawn hmasa ber dawn a ni.