Thla 7 lek an inrawih hnuah Real Madrid chuan an manager Rafa Benitez chu January ni 4, 2016 khan an ban a, a aiah Real Madrid player ropui ni thin Zinedine Zidane chu manager atan an ruat chhunzawm nghal a ni.
Zidane chuan,"Ka theihna zawng zawng he club tan hian ka hlan ang. Ka tan chuan vawiin hi ni pawimawh tak a ni. Ka hrilh theih chhun che u chu he club tan hian ka theihna zawng zawng ka seng ang tih hi a ni.
"Player nia he club-a ka rawn luh ni khan club ropui a ni tih ka hre chiang. Club tha ber leh fans nei tha ber kan ni a, hlawhtlinna thawhchhuah ka tum dawn a ni," tiin a sawi.
Pathianni zan khan Real Madrid hian Valencia chu 2-2 in an inhnehtawkpui a. Nimin khan Real Madrid board of director-te an inhmukhawm a. Spanish chanchinbu lian Marca leh AS te chuan Real Madrid-in an manager an ban thu an tarlang hmasa a.
Santiago Bernabeu-ah 4-0 laiin Barcelona an hneh lo a nih kha. Khami tum khan Benitez hi an ban ngei dawn niin media te chuan an tarlang tawh a, mahse Real Madrid president Florentino Perez chuan,"Rafa hian hna a tan ve chauh a, tun dinhmunah chuan kan ban hrih mai dawn lo. Hetih lai hian a chet dan azirin nakin lamah a chungchang kan ngaihtuah ang chu," tiin a sawi a nih kha.
Pathianni zan khan Gary Neville-a enkawl Valencia lakah 2-1 in hma an hruai ren rawn a, mahse 2-2 in an inhnehtawkpui leh a. Barcelona hnaih theihna chance tha tak an bawhpelh leh ta a ni. Champions League last 16 lut mahse La Liga table-ah pathumna an ni mek a, Copa del Rey-ah player khelh phal loh an lo khelh tir avangin Real Madrid chu hnawhchhuah an ni bawk a. Real Madrid dinhmun tur anga an din loh avangin Real board te chuan Chelsea leh Liverpool manager lo ni tawh Rafa Benitez chu an ban ta a ni.
Rafael Benítez hian Real Madrid chu game 25 a khelhpui hman a, game 17-ah hnehna a chanpui a, game 5-ah an khingpuite an draw. Vawi thum chak loh an nei, Win rate 68 per cent lai nei chungin Real Madrid chuan Benitez hi an ban ta a ni. A game khelhpui dan atangin Real hotute hian Benitez hi an ring lo a ni deuh ber. Tin, Ronaldo pawh khan 'Benitez-a hnuaiah hian engmah kan hlawh chhuak lovang', tiin a sawi niin media ten thawk khat lai khan an tarlang a nih kha. Kha thilte kha a tak tak a nih a rinawm ta hle mai.
Real Madrid manager thar Zidane hi khawvela midfielder tha ber pakhat a ni thin a, a fingin football ngaihna hria kan tih ang kha a ni.1996 atanga 2001 thleng khan Juventus tan a khel a, 2001 atanga football a chawlhsan thleng 2006 thleng khan Real Madrid tan a khel a. Club, ram leh mimal lawmman a la hnem lutuk, footballer ten an suangtuahna zawng zawng hi a takin a tawng vek ti ila kan sawifiah ber ang chu, lawmman lak theih zawng zawng a la kim vek a ni. 2014 khan Real Madrid club Castilla manager a ni tan a, chumi hnuah Carlo Ancelotti assistant a ni leh. Tunah chuan Real Madrid manager a ni ta a ni.