Inrinni zanlai La Liga inkhelah Madrid club pahnih Real Madrid leh Atletico Madrid te an inlan a, khual mualah Real Madrid hi an chak laiin, champion lai Atletico Madrid erawh an mualah an tlawm thung.

Khelh 16-ah Real hian point 39 hlawhchhuak tawhin league hmahruaitu an ni chhunzawm zel a, Atletico hian khelh 15-ah point 29 an nei a, palina dinhmun an luah mek a ni.

Real Madrid hian Reale Arena-ah Real Sociedad an tlawh a, si hnih faiin Real Madrid hi chakin, point thum nen an haw.

Real tan hian Brazilian forward Vinicius Junior leh Serbian striker Luka Jovic te chuan goal khat ve ve an khung a ni.

20mins an khelh hma in tun season-a che tha em em mai Real Madrid striker Karim Benzema a inhliam a, French striker hi khel chhunzawm thei lovin lak chhuah a ni a, a aiah Jovic dah luh a ni.

First half-ah goal a lut lova, mahse second half tir lamah Vinicius chuan Real goal hmasa zawk a khung. Vinicius hian Jovic ball a pe a, box chhungah inpawt luh nghalin, Vinicius hi ball pek leh a ni a, goal-ah a khung zui bawk, si khat faiin Real in hma an hruai.

Minute sawm hnu velah chiah Real hian an goal hnihna an thun a, corner atanga ball vawrh luh chu Casemiro chuan lo khawihin, Jovic-a’n goal-ah a lo khung chhunzawm a, 2-0 in Real hma a hruaipui.

Hun tawp dawnah Real hian chance tha tak an nei a, mahse Vinicius-a shot tha tak chu Sociedad goalkeeper Remiro chuan a lo save tha hle a, 2-0 hian inkhel tawpin, Real hian hnehna an chang ta a ni.

Atletico Madrid chuan Wanda Metropolitano-ah Mallorca an lo mikhual ve thung a, 2-1 in mikhual lam Mallorca hian hnehna an chang.

Atletico tan hian Matheus Cunha chuan goal a khung a, Mallorca tan Franco Russo leh Takefusa Kubo te chuan goal an khung ve bawk a, Mallorca hi point thum an hlawhchhuahpui.

First half-ah goal a lut lova, 70mins an khelh hma hretin Cunha chuan Atletico Madrid hi hma a hruapui. 80mins-ah chiah Russo chuan Mallorca si phurh a rul a, team hnihte hi 1-1 in an inhnehtawk dawn emaw tih hnuah Kubo chuan inury time-ah Mallorca tan goal khung lehin, Mallorca hian champion lai lakah hnehna pawimawh tak an chang ta a ni.