Real Madrid club chuan official-in la puang lo mahse Zinedine Zidane chuan contract thar a ziah thu a sawichhuak.

Zidane hian thla 18 chhung Real Madrid a enkawl ta a, Champions League title pahnih leh League title pakhat a chawi tawh a ni.

Madrid chuan an player engemawzat contract thar an ziahpui tawh a, news conference neihnaah Zidane chuan, "Contract ziah chhunzawm chungchangah chuan ka ziak fel tawh e. Hma lam ka thlir thui vak lo, ka ngaihpawimawh zawk chu tun hun hi a ni e," tiin a sawi.

Tun season zawh ruala a contract tawp tur Zidane hian August thla khan Real Madrid chuan kum thum dang atan contract thar an zawrh leh thu a sawi a, tuna contract thar a ziah pawh hi kum 3 chhung atan a nih a rinawm.

Kum 45 mi French coach hian Real Madrid B team a enkawl thin a, Rafael Benitez a thlak, Real a enkawl atangin team ropui tak a nihpui nghal.

January 2016 khan Real Coach hna hi a thawk tan a, a kum khatnaah Champions League a chawi nghal, a season hnihnaah kum 2012 hnua a vawi khat nan League title a lakpui leh a, UEFA Super Cup vawi hnih chawi tawhin Fifa Club World Cup a chawi tawh bawk a, Champions League title humhim thei hmasa ber a ni bawk.

Nilaini zan hian Real Madrid chuan La Liga-ah Real Betis an hmachhawn dawn, Pathianni zana 3-1 a Real Sociedad an hneh tuma inhliam an defender Theo Hernandez chu dar hliam avanga an chhawr theih loh tur thu Zidane hian a sawi bawk a ni.