Manchester United chuan Old Trafford-ah Crystal Palace an mikhual a, mual neitu United hian Fred-a goal khat hmangin hnehna an chang.
Ralf Rangnick chuan a vawi khat nan Manchester United a enkawl ta a, a game khelhpui tum dan pawh tlem chuan a lang chho kan ti thei awm e.
Goal awmchhun hi second half minute 77-naa Fred-a pet goal a ni a, Greenwood-a ball pek tha zet chu Fred chuan box pawn atangin mawi takin goalkeeper a pet khum a, a khairep chiang khawp mai.
Manchester United 1-0 Crystal Palace
(Fred 77')
PLAYER RATINGS
Man Utd: de Gea 6, Dalot 7, Lindelof 7, Maguire 7, Telles 7, McTominay 6, Fred 7, Fernandes 7, Rashford 5, Sancho 7, Ronaldo 6, Greenwood 6, Elanga 6, van de Beek 6.
Palace: Guaita 7, Clyne 6, Tomkins 7, Guehi 7, Mitchell 6, Kouyate 6, Gallagher 6, Schlupp 6, Ayew 6, Zaha 6, Benteke 6, Edouard 6, Olise 6, Eze 6.
Rangnick chuan Bissaka aiah Dalot a thlang a, Carrick-a hnuaia khel tha tak pahnih Telles leh Dalot te chu United attacking puitu an ni leh. Holding midfielder pakhat a chhawr ngam bik lo, McTominay leh Fred te Rangnick chuan a chhawr ve leh tho a. 4-2-3-1 formation tho rawn hmang ve lehin an game erawh tlem chuan a danglam ta deuh.
Inkhelh tan atanga minute 25 vel chhung chu United player-te chuan Rangnick-a'n khelhpui a duh dan angin an khel kan ti thei awm e. Rashford leh Sancho te chu an khingpui hnaihchilh zung zung tura tih an ni a, Ronaldo pawh a bang bik lo.
An khingpuite defensive third-ah United hmatawngte hian an nawr buai a, Palace tlarhnung ten pass-na tur dang an hriat tawh loh hnuah an vawrh ta pup thin a. United hian high pressing game an khel, chance pawh an nei zauh zauh, chutih laiin an chance neih te an hmang tangkai thei lo.
United player-te an tlan tam a, Palace hian player tlan chak tak tak an neih ve tho avangin United hian high pressing game an khel rei thei bik lo. Inkhel a hmuhnawm loh tual tual a, second half tir lamah phei chuan United game pawh a nawi ve hle.
Direct football khelh an han tum a, ball an vawrh nasa, chutih laiin ball an inpe sual ve nasa bawk. Rangnick chuan Sancho la chhuakin Greenwood a dah lut a, Rashford la chhuakin Elanga a dah luh bawk. Goal-ah an inhnawh hnem zel a, minute 77-ah Greenwood-a thawhrah Fred chuan goal-ah a thlawh lut ta a ni.
He match-ah hian Jordan Ayew chuan Tomkins-a tauh chu hnai set sawt atangin a pet goal teuh hle, Ronaldo chuan chance a nei ve leh zauh thin a, a volley tha zet chu Palace defender Marc Guehi chuan a lo dan sak. Fred-a shot tha zet pawh Tomkins chuan tha zetin a lo dan sak bawk a ni.
Solskjaer-a hnuaia player sawisel hlawh ber Fred chu Carrrick-a hnuaiah ropui taka a khelh hnuah Rangnick-a hnuaiah pawh tha takin a khel chhunzawm zel a. A work rate a tha a, ball a chang hnem bawk, chutih laiin hla tak pass a tum changin tihsual erawh a la nei hnem.
Rangnick chuan left wing lam a hmang hnem tih a lang chiang. Luke Shaw leh Bissaka te pahnih ai hian Dalot leh Telles te hi ball vawrh kawngah chuan an tha zawk niin a lang a, team tha em em lo an hmachhawn tumin anni pahnih hi attacking neih nan hman a tum dawn niin a lang. Chutih laiin Liverpool leh winger tha an hmachhawn hunah erawh an khawng tawk lo maithei a ni.
United-in an harsatna tawh thin chu goal an venghim zo lo thin kha a ni a. Chu chu Rangnick pawhin a ngaimawh ber bawk. United a enkawl hmasak berah goal a chhuah lohpui bakah point 3 a hlawhchhuahpui a, result tha tak a ni chiang.
Hetih lai hian Rangnick hian training vawi khat emaw vel bak United player-te a la hrual hman lo. Palace an hmachhawn tuma an game tir lamah high pressing game khel mah se an ti rei thei bik lo. United player-te hian high pressing game hi an khel reng thei ang em? Tih chu zawhna chhan harsa tak a ni mek e.