Paris Saint-Germain chuan Tottenham Hotspur playmaker Christian Eriksen chu an hmutai hle a, August 31 a European transfer window an khar hma ngeiin £100 million vela lakluh an tum niin an sawi.

Tottenham hian Denmark playmaker hi contract thar an zawrh mek a, Eriksen hian contract hi a la ziak thar chiah lo a. Hetianga contract ziah belh a la awm loh avang hian European club lian eng emaw zat chuan an ngaihven thar hle a, boruak ngaichangin an beng an chhi kar hlawm a ni.

PSG hian hun rei tawh tak chu Eriksen hi an lo thlithlai tawh a, Spurs manager Mauricio Pochettino hnuaia player pawimawh berte zinga mi niin, World Cup hma khan an duh tih hi an lo sawi lang tawh a ni.

Kum 26-a upa Eriksen hian season liam taah khan goal 14 ngawt mai a thun bakah mi goal thun tur 10 a siamsak bawk a, Inrinnia season thar bul tannaa 2-1 a Newcastle United an hneh pawh khan player thawh hlawk deuh ber a ni a. Spurs chuan Eriksen hi hralh ai chuan contract thar ziahpui an duh zawk a, chutiang tur chuan hma an la mek a ni.

Kumin nipui transfer window inhawn chhungin Spurs chiah hi player thar lalut lo an ni a, Pochettino chuan chairman Daniel Levy hnenah Eriksen chu hralh chi a nih loh thu a sawi a, January thla hma chuan a aiawh tur an lei theih tawh dawn loh avangin an chelh ngei ngei a ngai tih a sawi.

Pochettino leh Eriksen te hi an inzawm tha angreng hle a, Eriksen hian Spurs-ah kum hnih chhung atan contract a la nei mek a. Spurs player dang Harry Kane, Dele Alli, Davvinson Sanchez, Erik Lamela leh Son Heung-min te chuan contract an ziak thar tawh hlawm a, Eriksen chiah hi contract la ziak thar lo a la ni.

Real Madrid pawhin Croatian veteran Luka Modric chuan Inter Milan a pan ta a nih chuan a hmun ruak luah turin Christian Eriksen hi an duh niin an sawi bawk a. PSG hian Thomas Tuchel hnuaia an squad tichak turin Eriksen hi an beisei ve bawk a. PSG hian Julian Draxler leh Angel Di Maria te chu Financial Play dan zawm tha tura hralh an rilruk mek a, Eriksen hi lakluh an tum thung a ni.