GIG Motors Pro Volleyball League semifinal chu June ni 14, Nilai zan khan R Dengthuama Indoor Stadium, Mualpui Hunthar leh Ramhlun SC chuan an khel a, Hunthar Veng chuan 3-1a Ramhlun Sporting Club hnehin final an lut a,  final-ah Chhinga Veng nen anin hmachhawn ang. 

Hunthar Veng chuan 3-1Ramhlun Sporting Club 

( 25-17, 23-25, 25-16, 25-21)

R Dengthuama Indoor Stadium, Mualpuiah Hunthar tantu mipui an pungkhawm tam hle. Inkhel tan a ni a,  Hunthar chuan inkhel an thunun zawk.

Inkhel boruak sang takah Sarang S Lal chuan Hunthar tanpuiin point 21 a hmu a, point nga hloh ve mah se LG D3 Player of the Night trophy a dawng. Hunthar an chak theih nan Santhosh Kodakkal chuan a thawh hlawk bawk a, point 24 hlawhin vawi riat a tisual.

Team pahnih Mizo player zingah langsar thama che tha an awm lo. RSC inghahna state pawn player zingah Hafeel VP chuan tum dang a pha lo va, point 15 a hmuh laiin 17 a paih.

Set khat an lak theih nan RSC tan rinrawl Suresh Chandra Khoiwal Vicky chuan awmzia nei mah se team a fuih phur zo bik lo va, point 25 hmuin 14 a hloh. Kawng hrang hrangah Ramhlun North team-in talbuaina an ngah zawk a, Hunthar laka an tlawm tawhna chhang let turin nung takin an inlan rei thei lo.

Kar hmasa nilaini khan Huntharin 3-1 thovin RSC an hneh tawh. Semifinal-ah hliam vangin an setter rinrawl leh captain Remsangzuala an hmang thei lo va, chuti chungin anmahni tantute beiseina chhang letin chak phuin an khel.

Kar leh thawhlehni zanah final an hmachhawn dawn a, set khat mah la lova an hneh loh tawh Chhinga Veng an tum ang. Hunthar hian league bul an tannaah Chhinga Veng tawng nghalin chiang taka an tlawm a, hemi hnu hian vawi li chak zawn mekin final-ah thil danglam thlentir theih an inbeisei.

(adsbygoogle = window.adsbygoogle || []).push({});