GIG Motors Pro Volleyball League Hmeichhia final chu June ni 16, Zirtawp zan dar 8:00PM-ah Power Department Sporting Club leh Electric Veng ten an khel dawn.
Hmeichhe champion hmasa ber nih inchuhin Power Department Sporting Club leh Electric Veng an inhmachhawn dawn a, R Dengthuama Indoor Stadium, Mualpuiah an inkhel ang.
Tunlaia Mizo hmeichhe team tha pahnih hi league round-ah inhmachhawn tawhin an inbei tawk hle a, set nga an inkhelh hnuah (3-2) 25-18, 17-25, 25-19, 22-25, 21-19 in Power an chak hram.
Team pathum an inel a, Power hian 3-0 in Durtlang an hneh a, league-a sang ber ni chungin final an lut. Electric hian 3-1 in Durtlang an hneh ve thung a, Power laka an tlawmna chhang let turin hun tha an nei a, fiahna an hmachhawn ang.
Electric-in Power an hmachhawn laiin tun dinhmuna an innghahna lian tak Preeti Singh an chhawr hman lo. Kolkata atanga an lak luh feet 6 leh inchi 2-a sang hian Durtlang lakah team tanpuiin a khel tha hle.
Mizorama hmeichhe team tha hlun leh tlo ber Power-in a hmain Electric hneh tawh mah se fiahna tling a ni dawn a, vawi hnih an khelh tawha LG D3 Player of the Night lawmman dawng ve ve captain Vardingliani'n mi mal takin elpui a nei dawn bawk.
Electric nen league-a an inkhelh tumin set hnih ve ve an lak hnuah 13-5 in Power-in hma an hruai. Mahse, Electric-in bei letin 14-13 in an lehpel a, point khat hmuh belh se chak zawk tur an nih laiin Power-in fei takin an khel a, vawi ruk an deuce hnuah an tlang.
Hnehna an chan theih nan India team-a tel tawh Dingi'n point 33 hmuin 12 a hloh va, inkhel vawi khata mi mala point hlawh tam ber a ni. Durtlang hmaah Power captain hian point 20 thawk chhuakin vawi sarih a tisual a, set riat a khelh tawhah point 53 hmuin 19 a hloh.
Power-in Dingi thlawp turin RK Lalfakmawii leh R Malsawmtluangi an kawl a, Vanlalremruati pawhin team fuih phur thei turin theihna a nei.
Electric-in Power thuneihna beng hniama champion hmasa ber ni turin inrintawkna an nei thar hle ve thung. Mizo player tha an kawlte bakah state pawn atangin an neih belh a, tha zawka inlan theih an inbeisei sang.
Captain Lalbiakdiki, Lalmuanpuii leh Sangzuali ten inkhel vawi khatah point 10 hlawh chhuak turin theihna nei mah se, tihsual an neih fo bakah Power hneh tur khawpin team an tanpui zo lo. Preeti an kawl atangin team tan kawng a awlsam phah a, an harsatna tam tak sukiangin team a tichak.
Preeti hian Durtlang hmaah set li khel tawhin point 25 a hmu a, 12 hlohvin LG D3 Player of the Night trophy a dawng nghal. Power rinrawl Dingi nen khaikhin tham an ni dawn a, final-a ngaihven hlawh tur an ni.
Hmeichhe champion hian trophy leh Rs 50,000 an dawng ang a, pahnihna kutah Rs 30,000 leh pathumna Durtlang hnenah Rs 10,000 hlan a ni ang.
Mi mal lawmman chi hnih siam a ni a, an khelh tawh chinah Best Player lawmman trophy leh pawisa fai dawng turin Dingi'n rin a kai. Best Emerging Player thlan a ni dawn bawk a, PVL 2 chhunga mi mala hmasawn leh invawrh sang ber hnenah trophy leh pawisa fai hlan a ni ang.
(adsbygoogle = window.adsbygoogle || []).push({});