Chelsea chuan Spanish striker Alvaro Morata an la dawn ta, Manchester United-in Belgian striker Lukaku an lei fel tawh, Arsenal-in France international Lacazette an la tawh bawk. Nikum lama an lei mah nise Manchester City chuan kumin atangin Gabriel Jesus an chhawr tan, ani hian 2017/18 season bul a tan ngei dawn bawk a, tun season thar chu Premier League a hmuhnawm zual khawp dawn e.

Heng striker-te hi tha tak tak vek an ni a, records pawh an nei tha, team tan an thawhhlawk dawn em? Tih lam ngaihtuah teh ang.

Alexandre Lacazette

Arsene Wenger-a'n a duh taka a lak hi chu che chhe fal an awm khat khawp mai, he kum 26 mi France foward hian Premier League-ah tawnhriat la nei lo mahse a chetchhiat a rinawm loh. A chak a, ball pawh a keng thei, a positioning a fuh thin em em bawk nen.

Arsenal hian midfielder an nei chhe lova, Wenger-a system-a khel chi tak a ni dawn niin a lang. Box pawn atangin goal a khung thei a, box chhung atang hlei hleiin goal a khung thiam. Alexis Sanchez hi a cham dawn nge dawn lo a hriat loh, kum khat dang contract a la neih chhung hian Wenger chuan chelh hram a la duh dawn niin a lang.

Sanchez a la cham a nih ngat chuan Arsenal hian hmatawng an nei tha khawp ang le. Arsenal-in Premier league title lak kan tum ti mahse an tan thil theih a ni tlat mai. Hetih lai hian thil pakhat chu, season tirah Arsenal game a tha ziah, season chawhnu lamah erawh an che chhe chhunzawm thin. Hei hi a chhan ber chu an squad a chhah that tawk loh vang a ni.

Season liamta khan Lacazette hian Ligue 1 game 30 khelin goal 28 a khung thei a, assist vawi 3 neiin Champions League-ah goal 6 a khung tling bawk.

Alvaro Morata

Conte hian centre forward tha tak a duh tih a chiang, Diego Costa pawh a chhawr thiam nghal mai, hetih lai hian Costa a chhuah ngei a rinawm avangin Chelsea hian an player hlui Lukaku an ngaihven, mahse United lamah a kal ta a. Morata an la ta chat, Lukaku leh Morata game khelh dan kan en chuan centre foward atana hman chi an ni a, midfielder 5 hman a; tlar hnung tihphui hi Conte thupui hmasa ber niin a lang.

Real Madrid-ah season khat cham lehin; khelhna hun chang tam lo mahse a khelh chhunah goal a khung thei. 6ft-a sang a ni a, ball kangah pawh a tha kher mai, ball a thiam a, box pawn leh chhung atangin goal a khung thei. Defender pahnih hi chu engtik lai pawha bum thei niin a lang, hei tak hi a tangkaina tur a ni.

Hetih lai hian English Premier League-ah tawnhriat a la nei lo, hei erawh a harsatna tawh theih niin a lang tlat mai. Chutih laiin Italy-ah pawh tawnhriat lo nei tawh a nih avangin a buai em em a rinawm loh.

Chelsea hi striker-te thlanmual a ni tia sawi thin a ni a, striker thenkhat flop tak tak an awm vang a ni. Hemi chungchang sawi apianga a hming sawi lan ve ziah thin chu Fernando Torres kha a ni a, a nihna takah chuan Frank Lampard a awm vang niin a lang. Lampard kha midfielder ni mahse goal a ngam em em, a shot deuh pawp zel a, goal pawh a khung hnem, midfielder-in an shot zel chuan striker tan chuan a bang nawi lo chan mai kha a ni tawh a, Torres kha a demawm em em hran loh.

Season liamta khan Morata hian La liga game 14 chiah start mahse goal 15 a khung thei a, assist pawh vawi 4 lai a nei bawk.

Romelu Lukaku

Jose Mourinho pawh hi centre forward chhawr thiam a ni, hei vang hian Zlatan Ibrahimovic pawh a lalut chat a nih kha. Alvaro Morata pawh an dawr tih a chiang, mahse Ramos leh De Gea transfer chungchangah club pahnihte hi an inti thiam lo niin a lang, United khan Morata an dawr khan a man a to an tih avangin khaw dang an hawi ta nia sawi a ni a, mahse Chelsea lamah man tlawm zawkin an chhuah leh ta tho a.

Lukaku hi 6.2ft-a sang a ni a, Premier League-ah tawnhriat a ngah tawh avangin Jose chuan lungsi takin a lalut ta nia ngaih a ni. United tan Lukaku hi a tangkai viau a rinawm, a sang a, ball a dawng thei, a ball khuap a thain a finishing a tha tho bawk si a, a chawmtu tur midfielder tha an neih avangin United-ah hian a chetchhiat a rinawm loh.

Drogba kha a tir khan Chelsea fans pawhin an ngaina lo a nih kha, a chak thlawn, goal a thelh hnem bawk si. Mahse Jose-a'n theih tawpin a'n chher a, Chelsea player zinga fan-tena an lawm ber a ni ta a nih kha. Tin, Jose hian Diego Costa pawh a chhawr thiam bawk, Lukaku hi Jose-a hnuaiah a chetchhiat a rinawm loh.

Season liamta khan Lukaku hian Everton tan league-ah game 37 khelin goal 25 a khung a, assist pawh vawi 6 a nei.

Gabriel Jesus

Striker pathum kan sawite nen erawh Jesus-a game hi chu a danglam daih. A lian lem lova, 2016/17 season chawhnu lamah a inlan, England-ah a buai lo tih a lang chiang. Premier League hi game physical tak a nih avangin striker lian a ngai tiin ngaihdan kan lo nei a nih chuan, Sergio Aguero hi a lian em? Premier League goal khung hnem ber pakhat a ni mek a nih hi.

Guardiola-a'n Barcelona a enkawl lai khan centre forward an nei tha lo, chuti chung chuan goal an khung thei em em. Tunah hian Aguero leh Jesus hi lo inkawp dawn ta pawh nise, City hian an tangkaipui dawn tih a hriat tawh. Jesus hi side lamah pawh a chhawr theih dawn a, ball a thiamin a tlanchak em em.

Season hmasaa Guardiola-a game kan en chuan, counter attack hmanga goal khung an neih hnem zia kan hria ang. Sterling leh de Bruyne an nei bawk a, Jesus hi a tlanchakin counter attack neih nana player duhthusam a ni. Ball a thiam avangin box chhungah pawh a buai lo, a finishing a tawih em em zui bawk nen.

Season liamta Premier League-ah Jesus hian game 10 lek khel mahse goal 7 a khung bakah assist vawi 4 a nei a ni.

Lukaku, Lacazette leh Morata te nena khaikhin chuan kei Jesus hi ka duh ber, a game a hmuhnawmin a thiam zia kan hmu chiang tawh. 2018 World Cup-ah pawh hian Brazil first choice a nih ngei a rinawm. Mimal tin hian ngaihdan kan nei vek a, striker-a ka duh ber chu Ronaldo kha a ni a, a khup kha hliam lo selang chuan a ropui zual tur zia chu. Ani anga striker tha kha chu kan hmu khat ta raih dawn a nih hi.