Khawvela football league ropui ber tia sawi English Premier League khelh tan atanga tun thlengin record thar a awm chho mawlh mawlh a. Player hmasate’n record an lo siam tawh thenkhat chu thangtharin an khum a, khum theih loh pawh a awm nual a. Heng zingah khum harsa tura ngaih langsar zual pathum han tarlang ila.
Khel hnem ber:
Gareth Barry chuan he record hi a siam a, vawi 653 ngawt mai a inkhel a. English footballer hian club hrang hrangah a khel kual nual a, Aston Villa, Manchester City, Everton leh West Brom ah te a kual hman a ni.
Barry hian Manchester City chu Premier League title vawi khat a lakpui a, 2017-18 season khan Ryan Giggs-a record siam, vawi 632 khelh tlin chu a khum a, Giggs hi pahnihnaah a awm a, Frank Lampard chu pathumna niin, palinaah David James a awm a ni.
Tun dinhmunah Premier League player la chawl lo zingah vawi 500 aia tam inkhel an awm lo a, Jermain Defoe chu vawi 493 a inkhel tling a, James Milner chu vawi 486 a inkhel tawh bawk a, anni pahnih hi Top 20-ah chuan an lang pha a. Heti chung hian Gareth Barry leh Ryan Giggs te chu an tan khum ngaihna a awm tawh hmel loh hle a. Barry hian a lo berah season 6 atanga season 10 vel chu record hi a chelh zui theih ngei a rinawm.
Goal thun hnem ber:
1992 atanga Premier League bul an tan hnuah striker ropui tak tak an awm chho nuk tawh a, heng zawng zawng zingah hian Alan Shearer tluka goal thun hnem an la awm lo.
Geordie legend hian game 441 khelhah goal 260 zet mai a thun tling a, tun thlengin a record siam hi khum thei an la awm lo a. Shearer hnaih bertu chu England captain hlui Wayne Rooney niin, Rooney hian Shearer hi goal 52 in a pha lo a. Premier League atangin Major League Soccer lamah a lut leh ta bawk si a, hei vang hian a tan chuan Alan Shearer khum a harsa tawh viau ang.
Jermain Defoe leh Sergio Aguero te chu tuna la inkhel thin zingah Premier League goal thun hnem Top 20-a lang pha an ni a. Mahse, anni pahnih hi kum 30 tling tawh ve ve an nih avangin Alan Shearer chu an tluk theih a rinawm tawh lo a ni.
Assist hnem ber:
Ryan Giggs chuan Premier League bikah mi goal thun tur vawi 162 ngawt mai a siamsak a, hetiang anga tam midang thun tur siamsak thei hi an awm hnai lo hle.
Chelsea midfielder Cesc Fabregas chu Ryan Giggs hnaih bertu niin, Fabregas hian vawi 51 ngawt maiin Giggs hi a la pha lo a. Kum 31-a upa Fabregas tan chuan Welshman Giggs lehpel thei tur hian a lo berah season 4-5 vel a la ngaih hmel a, chu pawh inhliam miah loh a ngai ang.
James Milner, Ashley Young leh David Silva te chu Top 20-a lang pha an ni hlawm a, mahse anni phei hi chu Giggs ai hian vawi 80 vel zetin an hniam zawk a, an kum zat ngaihtuah phei chuan record thar siam chu tih ngaihna a awm hmel loh hle.