Premier League game rorum zia leh tharum ngaihzia hretu vek kan ni. Player tha leh thiam tak tak khel karah hian player thinchhia leh mahni khelhpui te pawh tih nat hreh lo an awm nawk a ni. A hnuaia kan tarlan tehi player zaidam nia hriat an ni ngai lo ti ila kan sawi sual tam lo hle ang.
1. Patrick Vieira- He French Midfielder tha zet hi Arsenal tan a khelh chhung khan Premier League-ah red card tum riat zet a hmu hman a ni. Arsenal leh Manchester United inkhel kha Roy Keane leh Vieira hian an ti hmuhnawm zual kan ti thei ang. Arsenal-in hneh loh nei loa Premier League an chawi tum khan an captain a ni.
2. Richard Dunne- He Irish defender hian Everton, Manchster City, Aston Villa leh Queens Park Rangers tan a khel hman a ni. Premier League game 431 zet khelin a ni pawh hian red card vawi 8 lai a hmu hman a ni.
3. Duncan Ferguson- Everton Forward hlui ft 6'4 zeta sang hi a thinchhiat leh khelh dan rorum tak avangin Everton fans-te chuan an ngaina hle. Everton tana goal 82 lai thun thei hian striker ni chungin red card vawi 8 zet a chawi hman a ni.
4. Roy Keane- Manchester United midfielder rorum zet hi Premier League midfielder tha ber pawl a ni kan ti thei ang. Roy Keane hian Manchester Derby-ah City defender Alfe-Inge Haaland khupah tlawh sakin Haaland hian football a chawlsan phah hial a ni. Keane hi match nga zet hrem a ni a, £150,000 chawitir a ni bawk. Keane hian red card vawi sarih zet Premier League-ah a hmu hman a ni.
5. Vinnie Jones- Chelsea tan pawha khel tawh Vinnie Jones pawh hi pa rorum tak a ni. Kum 1985 a Wimbledon F.A Cup chawipui tu defensive midfielder hian red card tum sarih zet a chawi hman a ni. Football a chawlsan hnuah pawh Actor hlawhtling tak a ni thei a ni.
6. Namenja Vidic- Serbian defender Vidic hian tun hnai lawk khan football a chawlhsan thu puang mahse a vanglai na na na kha chuan a ni tluk an awm lo kan ti thei ang. Vidic hian tharum a ngaina hle a tih theih a, a khelh danah pawh a hriat thin bawk. Vidic hian red card vawi ruk zet a hmu hman a, heng zinga pathum hi Liverpool lakah a ni.
7. Joey Barton- He English Midfielder hi a nungchang han tha deuh se chuan English midfielder tha ber pawl a ni thei ngei ang. Nimahsela Barton kan hriat larna erawh a thiamna vang ni loin a thinchhiat vang zawk kan ti thei ang. Manchester City, Newcastle United leh Queens Park Ranger tan pawha khel tawh hian Premier League-ah red card vawi ruk zet a chawi hman a ni. Barton hian 2011-12 season khan Queens Park Rangers tan tul lo zet a red card a hmuh avangin Manchester City Premier League champion an nih phah kan ti thei awm e.
