September ni 23, 2017 (Inrinni) khan Premier League match 8 lai a awm a, club liante chuan an khingpui an hneh vek.

Tottenham chuan 3-2 in West Ham an hneh a, Harry Kane chuan goal hnih khungin Eriksen chuan goal khat a khung bawk. Si thum faiin hma hruai mahse Hernandez chuan goal khat a khung, Aurier hnawhchhuah a ni chhunzawm bawk a, West Ham hian an siphurh rulh ngei tumin an nawr, Cheikhou Kouyate chuan goal khat khung leh mahse goal dang an khung thei ta lo a ni. Kane hian kumin chhungin goal 25 lai league-ah a khung a, ani aia goal khung tam pakhat chiah a awm, chu chu Lionel Messi niin, ani hian goal 35 a khung tling tawh a ni.

Manchester City chuan 5-0 laiin Roy Hodgson-a team Crystal palace an sawp a, City hian Premier League an game hnuhnung 3-ah goal 16 lai khungin goal an chhuah lo. 6-0 laiin Watford an sawp a, 5-0 in Liverpool leh Palace an sawp bawk. Hodgson hian Palace hi game hnih enkawl tawhin a la chakloh pui ve ve.

City tan Sterling chuan goal hnih khungin, Aguero, Sane leh Delph ten goal khat theuh an khung. Hun tawp dawna Delph goal phei chu pui tak a ni, box pawn atangin top corner-ah mawi zetin a thlawh lut. Sterling hian City tan league game hnuhnung 4 atangin goal 5 a khung ta der mai. Manchester United chuan goal khatin Saints an hneh a, City chu goal difference-a an that zawk avangin Premier League hmahruaitu thar an ni ta.

St Mary's Stadium-ah Manchester United chuan Lukaku goal khat hmangin si khat faiin hnehna an chang a, mual veilam sir atanga Young cross chu a tauh goal loh hnuah a pet goal ta tho a ni. Lukaku hian United tan a game 8 khelh tawh atangin goal 8 a khung tling ta a ni. Hun tawp dawn lamah Saints hian na takin an nawr a United tlar hnung pawh an buai teuh thin hle, Mourinho chu a nungchang a mawi loh avangin referee-in hun tawp dawn tak takah a hnawtchhuak nghe nghe a ni.

Chelsea chuan 4-0 in Stoke City an hneh a, Alvaro Morata chuan hattrick siamin, heng a hattrick siamna hi a lu ni tawh lovin, a ke hmang vekin a khung a, Premier League-ah goal 6 a khung tling ta a, a luin goal thum a khung bakah a kein goal thum a khung bawk, a hattrick siamna phei chu halfwayline bul atangin a khalh tlang nghe nghe a ni. Chelsea tan hian Pedro Rodriguez chuan goal khat a khung bawk.

Chelsea hian khelh 6 atangin point 13 an nei a, point thum lekin hmahruiatute pahnih an phak lo mek a, table-ah pathumna an ni mek.

League Cup-a an mualpho hnuah Liverpool chuan King Power Stadium-ah mual neitu Leicester City 3-2 in an hneh. Inkhel hmuhnawm takah Liverpool tan Salah chuan 15 mins-ah goal hmahruai a khung a, Coutinho chuan 23 mins-ah free kick atangin mawi takin a pet goal bawk. Liverpool tlarhnung a phui hleithei lo, Okazaki chuan si khat a khung a, hetih lai hian Leicester City attacking buai lai takin Reds hian an counter a, Henderson chuan goal thumna a khung.

Vardy chuan 69 mins-ah Mignolet save per chu tauh goal lehin, 73 mins-ah penalty atangin an siphurh rulhna chance tha tak an nei a, Vardy penalty pet chu Mignolet hian a lo dang hlauh a, 3-2 in hnehna an chang ta a ni. Everton pawh a chak ve ta nge nge a, Bournemouth tan Joshua King chuan 49 mins-ah goal a khung, si khat faiin hma an hruai ngar ngar a, 73 mins leh 82 mins-ah Baye Oumar Niasse chuan Everton tan goal a khung a, hnehna an chang ta a ni.

Everton 2 - 1 AFC Bournemouth

(Niasse 77', 82') (King 49')

Manchester City 5 - 0 Crystal Palace

(Sane 44', Sterling 51', 59', Aguero 79', Delph 85')

Southampton 0 - 1 Manchester United

(Lukaku 20')

Stoke City 0 - 4 Chelsea

(Morata 2', 78', 82', Pedro 30')

West Ham 2-3 Tottenham

(Hernandez 65', Kouyate 87') (Kane 34', 38', Eriksen 60')

Red Card : Aurier 70' (Spurs)

Leicester City 2-3 Liverpool

(Okazaki 45+2', Vardy 69') (Salah 15', Coutinho 23', Henderson 68')

Swansea City 1 - 2 Watford

(Tammy Abraham 56') (Andre Gray 13', Richarlison 90')

Burnley 0 - 0 Huddersfield Town